2015聖誕塔斯曼尼亞之旅 - Day 2 (22-Dec)

一早起身落酒店食佢個早餐。呢到嘅continental breakfast同歐洲嘅有啲分別，多左cereals，試左佢哋嘅muesli（中文叫什錦果麥），意思係什錦乾果加麥片。加左奶之後甜甜哋幾易入口。另外仲有啲生果之類嘅嘢，同埋咖啡同奶任飲。

食飽飽之後就揸車出發開始今日嘅行程。

 

今日主要plan去兩個景點：1 - 薰衣草場；2 - Cataract Gorge Reserve嘅Basin chairlift。

Bridestowe Estate

地址：296 Gillespies Rd, Nabowla TAS 7260, Australia

由Launceston揸車去Bridestowe薰衣草場要大概1個鐘。


今日天氣都幾好，不過就多左啲雲攪到影相唔係咁靚！

揸車去到要喺門口比入場費，A$10一位。12月係薰衣草開花季節，所以成場田都開滿晒薰衣草，入到去會聞到一陣陣薰衣草香味。

因為好多花，所以周圍都好多蜜蜂。成個草場都係嗡嗡聲，如果驚小昆蟲嘅人就要留意下喇。

喺入面影相影左個幾兩個鐘後就入去買下記念品同食下嘢。買左佢哋好出名果隻heat pad熊，都幾貴成A$60一隻。

另外想試下佢個薰衣草雪糕架，但係我哋想買果陣賣晒，得返朱古力，最終無食到。影多幾張相之後我哋就揸車去酒莊食飯。途中見有車厘子賣，買左1KG，幾甜幾爽脆。

 

好多人都去Josef Chromy呢個酒莊到食，我哋都選擇去呢到食晏。

 

佢呢到只係開始中午無晚餐，如果想食就要注意喇。不過如果只係買或飲酒10-5嚟都無問題。

不過原來係要book位嘅，最終要等一個鐘到先有檯比我哋，唯有喺酒莊到影下相打發下時間喇！呢啲係未熟嘅葡萄，我都係第一次見。







行左大概一個鐘我哋就返去，侍應就安排我哋入去坐。又點左一打生蠔做頭盤，再點左兩個主菜。佢呢到最特別係每一道菜都佩好晒一隻酒。例如生蠔配汽酒。因為我要揸車，另一半又唔好酒，所以叫左杯汽酒試下就算。講真用汽酒配生蠔又或者用水配生蠔，我食唔出有咩分別。





 整返件餐飽先！

 

再嚟個白身魚。

 

同一個慢煮豬腩肉。

 

再加多個沙律。



食物幾好味！應該幾難喺香港搵到相近嘅質素餐廳（同等價錢計）。食左咁多嘢，埋單A$114，大約六百零蚊港紙。唔平但係亦都唔貴，因為對住個酒莊景食飯，喺香港真係無機會試到！

經過油站入一入油先，喺澳洲大部分油站都係自助入油，有少部分鄉郊油站會有人幫你。入油步驟：1:打開油缸；2:拎起油槍，油機會自動reset做0，放油槍入油缸，再拉實油槍入油，當入到差不多滿果陣，啲油接觸到油槍咀，油槍會發出"咑"聲同時會停止加油。3:等一陣，再拉多次油槍，重複2-3次，make sure入滿晒，特別係還車果陣要入滿油先還車。4:記住油機編號再入去同收銀講個編號，佢就會check到入左幾多跟住收錢。

跟住揸去第二個景點，Cataract Gorge Reserve去坐佢果個吊車。注意呢到泊車係要錢嘅，同埋係買想泊嘅時間再印張飛放喺車頭。

Cataract Gorge Reserve

地址：74-90 Basin Road, Launceston TAS 7250, Australia

我哋買左來回，其實買單程就得，因為行返落嚟會去到好幾個景點，要搭返落去就要行返回頭唔兼上山。

結果我哋放棄返嚟果程，行落山。其實又係無咩特別，最特別係果到有好多孔雀同見到小袋鼠。





基本上同我哋香港啲水塘無咩分別只係人哋有架吊車同多條吊橋。

  

 

行完呢到都只係晏晝5點，見時間仲早同仲好光，臨時去埋Low Head嘅燈塔。

 

 

揸車過去大概9個字。果到無咩睇，只係得個燈塔同埋夜晚會有企鵝tour，不過我哋巳經join左Bicheno嘅企鵝tour，所以無join。去到影左一陣間相就揸返去Launceston市區食晚飯。

 

去左間叫Hallam's Waterfront嘅餐廳到食，又係無訂檯，結果要等個零鐘先有位，諗住去附近其他餐廳睇下有無位，都係無位，最慘係連等都無得等話fully booked。喺餐廳附近個公園坐下逛到夠鐘。入到即刻點菜。

叫左個Seafood chowder。味道偏咸！

仲叫左個2人份海鮮拼盤。上面啲生蠔，感覺開左好耐，唔係太新鮮。

 

 

 最好食係個薯條！

 

呢間嘢唔太好食，上返Tripadvisor到睇返啲人啲comment，好似有啲出入。埋單A$128，都幾貴又唔好食。之後就揸車返酒店執嘢，準備第二日搬去另一間酒店。

2015聖誕塔斯曼尼亞之旅 - Day 1 (21-Dec)

今次搭國泰零晨機（CX105）經Melbourne轉機去Tasmania嘅Launceston（QF2285）。

上機食完個宵夜就瞓喇。個空姐比錯左個早餐我當早餐。

國泰午晚餐例牌有Haagen-Dazs做dessert。今次隻味正常啲。

食飽就試下瞓，都係唔係咁瞓到。瞓下醒下。中間睇左幾套戲。經過8個鐘，終於到左澳洲試空。

中間轉機要等3個零鐘。行李無得直去Tasmania，一定要喺Melbourne拎左再寄倉。澳洲入境都幾方便，可以自助過關，唔使5分鐘就攪掂！

出左海關之後就搵下邊到有電話卡賣，其實周圍都有，報紙檔、便利店周圍都有。



我哋買左2張電過卡，兩公婆一人一張唔使分來分去，而且有電話方便聯絡。分開行都無問題！

我哋買左Telstra嘅卡，因為啲人講佢喺Tasmania嘅覆蓋最好。大部分時間都收到，係有啲山路同偏僻地方收路到。呢排應該做緊Promo，佢特價A$10就買到面值A$30嘅卡。當然二話不說即刻買啦。不過佢嘅Activate過程都幾麻煩同幾耐。Activate完要幾個鐘先用到。最麻煩係如果打錯嘢係無得再嚟過，一定要打上去客戶服務到人手activate，講左成大半個鐘先攪返掂囉！最慘係都係要等幾個鐘先可以用得。

入左閘之後等轉機嘅時候又無得上網又無咩嘢行，唯有去Cafe買杯朱古力同Muffin食下飲下打發時間喇。但係杯嘢好難飲囉，係個Muffin好少少。都幾貴，2樣嘢買左差唔多A$12成六十幾七十蚊港紙。終於等到上機啦，坐好之後準備起飛果陣，機長廣播話飛機漏油要檢查。



全機人落機等機組人員檢查，要等大半個鐘先可以再登機。結果我哋遲左成個鐘先起飛，去到Launceston成5:30囉。不過我哋都希望安全啲，始終係去玩啫，唔使搵命博！

落機之後又要過多次海關，Tasmania機場比澳洲本地更嚴，唔可以帶本地生果、肉類入島，佢會有隻狗查每一件嘅行李。

拎完行李之後就去拎車。今次喺Europcar租左架Corolla。

 

我哋租埋佢個GPS，都幾易用。架車都幾新，只係行左一萬kilo。**張相係我去夜晚返到酒店先影，所以多左十零K。

之後就正式開始我哋嘅Tasmania之旅。第一站係去酒店check in。我哋book左Balmoral on York。

佢有得免費泊車同埋包早餐。放低行李之後我哋就去搵地方食晚飯。去左間叫Laurceny嘅餐廳到食。因為無事先搵定地方食飯，是但喺Tripadvisor到搵左呢間，而佢喺Tripadvisor個排名都幾高。

地址：19 York Street, Launceston, 7250, Australia

點左生蠔做頭盤。

再點多2個main course。一個牛扒一個三文魚。

個生蠔無喺蠔場啲門市或者街市食嘅咁新鮮，但係都好過喺香港自助餐到食到果啲。食完巳經好飽！都幾好食！我哋唔知呢到啲Main course本身巳經跟左薯條，特登叫多左個薯條，攪到食唔晒！埋單A$95。

食完晚飯巳經9點幾無咩嘢可以做，只係得返超級市場可以行。喺澳洲啲牛扒平到你唔信呀！1盒4塊肉眼都係百零蚊。

不過因為呢一兩日都無得煮，所以忍忍手。只係買啲生果、水同嘢飲for嚟緊之後果幾日嘅行程。跟住就返酒店休息準備第二日嘅行程。