2015聖誕塔斯曼尼亞之旅 - Day 4 (24-Dec)

今日喺平安夜亦係我哋開始去Cradle Mountain住兩晚嘅行程。由Bicheno揸去要多過4個鐘，出發～～

呢間就係我哋尋晚住果間酒店，之前唔記得影，而家補返。

因為今晚住果到可以自己煮嘢食，所以我哋一早喺Bicheno間IGA買定嘢先。

 

睇下啲牛肉幾平！

但係發覺同Coles或者Woolworth無得比，好似牛扒咁，連T-bone都無。所以我哋揸返出去最近嘅Kings Meadows果間Coles。但係都講緊成150km，揸車去到巳經差不多中午喇。

呢間Coles超大！喺正個商場入面，但係無咩時間行。





喺Coles買定晒呢2、3日要食嘅牛扒、腸、沙律菜、粟米、生果、飲料等等。（提一提：酒店可能有鹽同胡椒提供，最好買定，而油呢就一定無，要煎蛋煎腸之類就要買啦。）我哋仲買左半隻燒雞做晏畫。買到擺滿架車仔呀!

 

食完晏又揸車出發去Moles Creek。首先去左Honey Farm。其實只係一個賣蜜蜂及相關製品嘅舖頭。買左啲蜜糖同蜂皇漿。仲有試埋佢個蜂蜜雪糕。

 

 

之後就去埋附近嘅動物保育中心。呢到有得近距離接觸袋熊、TAS魔鬼、袋鼠等等動物。不過一定要就啱佢哋個導覽時間。個工作人員會抱佢哋出嚟比大家摸下。一日應該有3、4場左右。

去完保育中心時間巳經差啱多4點半，而駕車又得返一半油。要揸緊時間去返最近嘅油站入滿油再揸去今晚住嘅地方。路程要差不多兩個鐘。所以原本plan左去嘅Sheffield都去唔切。沿途啲山路九曲十三彎，又要趕路又要好小心，要將所有專注力拎晒出拎，揸到個人鬼死咁攰。

因為酒店email寫住，接待處6點就收，我哋見仲有一段距離先到，就打定電話同酒店講可唔可以晏些少，等到我哋6:30，點知佢話將條鎖鑰放喺門口，叫我哋自己拎。雖然唔想亦有啲擔心，但係都無辦法。唯有盡快揸去酒店。揸到去酒店6:10。好彩有幾個台灣人喺到不停咁問啲酒店職員問題。我哋先可以趕得切。比埋尾數，問埋聽日行山啲嘢我哋就揸架車泊喺房前面嘅車位。呢個時候竟然有隻袋熊絲絲然走出嚟！我哋即刻落車同佢影相，不過佢一發現到有人就急急腳走人喇。

入去間房（應該用屋仔嚟形容貼切啲）。



你可以話用warm嚟形容，但係我覺得有啲細同舊。







廚房有齊需要嘅kitchen ware。

而我哋之前預訂嘅早餐亦都擺喺雪櫃入面同上面。份量足夠做早餐加埋晏晝呀！



跟住我哋分幾轉將啲行李、食物等等搬入屋。然後就開始煮晚餐喇。有沙律、牛扒、腸同湯。

仲有啤酒! 喺reception到買嘅。

食飽飽之後就要收拾返同洗返啲碗碟，跟住就洗白白。原本想出去探險睇下見唔見到啲野生動物，點知根本就唔使，佢哋會自己走嚟你門口。分別有小袋鼠同另一種唔知咩動物。下面張相果隻嘢仲特登喺我哋門口痾poo-poo。

個感覺幾特別，平時只會係我哋困住啲動物跟住睇佢哋。而家就倒返轉。不過好彩澳洲無啲熊呀、狼呀。如果唔係得度爛鬼木門真係幾驚。我中間瞓著都扎醒左幾次，擔心唔知有啲咩衝入嚟。

2015聖誕塔斯曼尼亞之旅 - Day 3 (23-Dec)

起身食完個cereal生果早餐就揸車出發。

第一站係去Ross Bakery。中間經過金寶鎮(Campbell city)，停低去個廁所。

澳洲啲公廁好鬼乾淨！分分鐘仲乾淨過啲商場廁所呀！再喺超市買左些少生果。

跟住就繼續揸多半個鐘到去Ross。但係我哋太唔小心，無check到佢聖誕期間嘅營業時間。原來佢由23號開始放假放到27號先再次營業。

Ross Bakery

地址：15 Church St, Ross TAS 7209, Australia

結果就白走一趟，話晒嚟到，無理由即走架，唯有去佢隔離果間bakery買啲嘢食。

買左個sausage roll同帶子批。

個sausage roll麻麻地，個帶子批係咖哩味嘅，係好多帶子喺入面不過味道只係普普通通。

食完就出發去下一站嘅Kate's berry farm。

Kate's berry farm

地址：12 Addison St, Swansea TAS 7190, Australia

呢到無得自己'宅'生果，只係有得食佢啲莓、甜品、雪糕或者買佢出嘅產品。食左個雪葩同法式薄餅，雪葩同香港食嘅無咩分別，個薄餅就整得幾靚，不過個人覺得太甜，可能因為我本身唔好甜品有關。

另外試過佢啲果醬，覺得士多啤梨係最好味，買左樽帶返香港。

話咁快又到食飯時間，所以下一站係去Freycinet Marine Farm食生蠔海鮮。

Freycinet Marine Farm

地址：1784 Coles Bay Rd, Coles Bay TAS 7215, Australia

由Berry farm揸過去唔使1個鐘。去到巳經係晏晝2點幾，但係都仲係人頭湧湧，排隊買嘢條龍差不多排到出門口。



搵好位之後我就出去買嘢，買左2打蠔、1隻鮑魚刺身、1隻龍蝦。啲蠔唔使講超新鮮，淡淡都有海水味。而且細細隻好易入口。鮑魚好彈牙，幾好食！龍蝦就相對普通左啲，如果可以中式整法同熱食會合我哋香港人口味多啲。

食完有啲唔夠喉！再加多左個牛油帶子同熟蝦。



食完先醒起唔記得同啲熟蝦影相😁😁，食得出係新鮮嘅，不過都係鐘意熱食同中式整法多啲囉。前前後後買嘢買左A$160，即係差唔多$900蚊港紙。

食飽飽之後諗住去Wineglass Bay Lookout，由Freycinet Marine Farm揸返出去會見到路牌指示，揸入去就會去到。去到中途先發覺原來我哋唔記得左買National Park Pass！唯有揸好Bicheno嘅tourist centre到買喇。成惠A$60。個pass有效期2個月，但係跟買果個人嘅姓同車牌嘅，即係如果你或者你朋友喺有效期內揸去啲National Park，除非你哋同姓兼揸返同一部車，如果唔係就麻煩你買過張喇。

 

買完個National Park Pass就順便去埋酒店check in，因為塔斯曼尼亞呢到啲酒店唔興24小時當值，多數朝8晚6，除非預先通知作安排，如果唔係去到會無人幫你check in，最慘係夜晚無地方瞓。

 

 

房間尚算整潔，擺低啲行李之後就立即揸返去，一來一回浪費左成個鐘呀！上到去我哋發覺有啲唔對路，點解行唔到落去沙灘嘅。到夜晚先醒起我哋去錯地方，雖然都睇到Wineglass Bay不過係要去Freycinet National Park先啱！





試過沿小路行15分鐘落去沙灘，但係愈行就愈多樹阻住，最終都係放棄行返轉頭。



喺呢到攪左成個鐘就揸車返Bicheno。返到去個天仲好光，喺市內揸架車四圍兜，去左睇Blow hole喇。





又去左搵間炸魚薯條店買炸魚薯條做下午茶。



即買即炸新鮮熱辣好好味！係無跟茄汁差左啲，比左A$2買盒茄汁。

距離夜晚企鵝團仲有2個零鐘，因為啱啱先食左個炸魚薯條做下午茶，食唔落嘢住。諗住去附近超市買啲嘢是但做晚餐就算。點知6:45去到巳經關門了！原來聖誕節期間收早，今日佢收6:30！唯有搵間餐廳食晚飯喇。超市附近有間中國菜、Cafe同意大利餐廳。中國嘢自己喺香港都煮到，Cafe就只有麵包，唯一選擇只係得喺超市對面果間意大利餐廳，上Tripadvisor睇啲comment唔差，去左問有無位，又點知有一張檯比我哋。咁我哋就選擇左喺呢到食喇！

嚟左咁多日，一次啤酒都未飲過，難得夜晚唔使揸車，食完都係揸2個街口就返到酒店。坐低即刻叫返支啤酒啤啤佢先啦！（雖則只係揸2個街口，我都係飲半支咋，免得有機會犯法！）

睇左一輪餐牌，叫左個Seafood Chowder：好大碗夠2、3個人飲，不過有啲咸同無之前果日飲到果個咁好飲。

一個塔省產火腿+菇薄餅：佢呢間嘢啲pizza係有gimmick嘅，就係柴火烤焗。講真我食唔出同用電爐焗嘅有咩分別，而且批底偏厚，唔似正宗意大利薄餅咁薄。

再加個燒牛肋骨：另一個又係偏咸嘅菜式。而且整得好燶，我唔知係失手定係設計係咁，同我諗嘅牛肋骨有啲出入。

埋單A$72。個人覺得麻麻地！但係無法，鬼叫自己無預備定啲嘢食，又無留意超市幾點收。食完就揸車返酒店休息一下，準備一陣間去企鵝導賞團。

企鵝團booking網址: http://www.bichenopenguintours.com.au/

出發前個零月巳經經email book好左個tour，亦都經信用卡比埋錢，收埋佢個confirmation。Book果陣巳經講好9點會嚟酒店接我哋。我哋亦都預早10分鐘出定去reception門口等，架車比原定時間遲左少少，起初都有啲擔心會唔會漏左定點，不過見到好多人都企喺到等先無咁擔心。9點2到架van先到。坐10分鐘到就到，喺邊到睇我真係唔知道，因為果到黑麻麻，幾乎仲手不見5指。好彩工作人員好醒目，巳經喺停車果個位接我哋。佢哋就係帶我哋嘅導賞員。

導賞員介紹完自己之後就開始帶我哋去睇企鵝，基本上周圍都有，大大話話完到不下過百隻企鵝。成年嘅又有、BB嘅又有。導賞員一路帶你睇一路解釋佢哋嘅習性同生活習慣。可能有人會話自己去邊到邊可以睇到唔使比錢，第一佢有車載你；第二佢有人帶你去睇同解釋比你聽，而且會警告你做咩嘢會影響到啲企鵝；第三佢哋賺左啲錢唔係全部袋晒，會用部分去整啲人造巢比啲企鵝住。如果自己去，可能係省左一百幾十，不過要冒住睇唔到同可能影響到啲企鵝嘅機會。我個人覺得唔值。

不經不覺差唔多一個鐘嘅導賞團就完左，工作人員會帶你利返出去頭先落車果個位，架車巳經喺到standby等我哋載我哋一團人返酒店。返到去又要休息準備第二日嘅行程。