第四日 - 旅行中最早起身1日, 由於想趕返去名居屋行百貨公司, 所以4點幾起身(日本時間即係香港3點幾鍾咋), 搭頭班車去立山站(即係立山黑部0既起點), 我地就係坐5:44分果班車!
呢班車最大0既好處係最快同埋係全日停得最少站0既一班車, 只停7個站, 全程亦只要51分鐘啫!, 不過呢程車都唔平, 盛惠
1,170円!
0係不到一個鍾0既車程入面! 我0地消滅左之前果晚買0既0野食!
1. 話用鹿兒島豬0既三文治!
2. 一盒仿真蟹柳度極高0既魚肉
(我買果時真係以為係蟹柳先買, 點知食完睇返個盒先知比人昆左)
3. 咁早起身! 當然唔少得要有提神醒腦0既咖啡啦!
好彩我地咁早, 冇咩人, 成架車0的位任我0地坐! 你如果夠膽, 可以1人瞓0係1張櫈都仲得! 食完0野2個人坐坐下就瞓著左, 跟住好快就到左起點"立山站"!
到站時見到0的人好衝忙咁, 我0地2個都係第一次0黎立山, 所以唯有跟住0的人行!之後出到去先知, 原來佢地係跑去買車飛! 但係落車到買完飛都仲未到開車時間, 睇下上面個鐘都仲係6點8咋!我0地去時未到夏天, 最早開上山果班車要7點先開!
單程每位要成萬円, 係全日本最貴0既鐵路! (唔好同我用新幹線比, 2者完全唔同), 以下0的相係我0係車站排隊等車時四圍影關於今年大雪壁0既資料!
今年(2009年)雪壁開放時間
雪壁同登山巴士比例
今年積雪同溶剩0既雪0既高度
唔洗等好耐就可以上第一架車車喇! 好彩我地早排隊, 可以有位坐不過架登山纜車! 不過無咩景睇同埋我地好不幸坐左邊無景0既!! 所以上美女平呢程車都無影相, 只有到站0既下面呢張!.
去到美女平 (海拔980米 - 太平山都只係得552米咋) , 0的人一落車又一支箭咁走去排隊上第二架車!
都唔明0的人比咁多錢坐車上0黎, 咁梗係每個景點都要睇, 每個景點都要去架! 我地就係有呢種態度, 所以無走去排隊, 咁我地就四周圍行!
行到其中一個景點 - 大古杉!
之後我地兩個人沿住呢個樹林仔行左一圈, 無咩0野睇, 不過發現到有個入口有條樓梯可以行落去! 個路口有個咁0既牌, 上面有幾種雀仔0係上面! 我0地見到有兩個日本好勇咁衝左入去, 本來我0地都想入去行下, 不過0的樹同草好密, 所以無跟到入去!
咁我地行完呢個景點之後, 就去左搭登山巴士上室堂, 但原來巴士有分2部, 1部係直上室堂, 1部係中途會停2個站
(彌陀之原和天狗平), 我地上左直上室堂個部車 (亦係最多人排隊o既), 坐坐下以為上錯車, miss左2個景點, 但原來係冇錯o既,
巴士上沿途0既風景都幾靚!
室堂係全程立山黑部最好玩0既地方, 不過由於落雨關係, 太滑, 我0地只係0係室堂中央地區行, 無辦法去到其他景點e.g.地獄谷。
我地一落到車就比站入面0既工作人員趕左入站入面! 站入面有樣只有室堂呢到先可以買到0既手信- "星之卡"朱古力杏仁。(切記要買就好買喇, 真係室堂限定!落左山係無得買架!)
如果唔買, 山腳就只有下面個隻o既冒牌貨 (雖然個味都好似), 但比室堂貴, 而且室堂仲有士多啤梨味 (個人覺得原味好食0的), 所以強烈建議上車前一定要係室堂到買。
呢隻叫雷鳥, 係"星之卡"0既代言人! 係咪好得意呢!
因為我0地實在太早到喇, 0的0野都未開, 連大雪谷(其實就係巴士上黎果條路!)都未可以行, 咁我地兩個又開始四圉行, 我地走果時, 真係要排長龍上山啦! 咁我地見路就行, 行下行下就去左個類似雷烏展覽館之類咁0既展館, 果到有得自己整雷烏腳印o既咭。
之後行下行下見到有度門可以出去, 原來出到去係 '雪之迴廊' , 類似係迷你版o既雪之大谷, 我地就沿住條路咁行出去,
之後到最好玩0既地方 - 室堂, 一大遍雪地, 對於我地0係熱帶地方生活0既人見到真係勁興奮, 雖然即刻0係果日晒到黑左, 之前美白o既功夫就咁係1日內摧毀左啦 (同事見到第一句係:嘩,你黑左呀)! 不過睇下片雪景, 唔講你以為我去左歐洲唔知咩雪山呀!
我地行到玩下影下相咁就過左粒幾鐘, 我地之後又走返入車站! 入到去0的鋪頭都陸陸續續咁開門, 玩雪玩到凍凍地, 見到有蒸飽, 二話不說就買左兩種味!
我地分別買左一個豕肉一個紅豆, 但係味道麻麻! (溫馨小提示: 各位記緊自己買定飲品上山, 呢到唔同平時其他景點, 0野飲唔再係120円 or 150円, 而係加左個double! 一罐350ml可樂要250円, 寶礦力一樽要350円!)
跟住都等到大谷開喇, 呢張係入口0既路線圖!
話雖我0地係尾二果日去, 但係個雪谷仲有13m高, 最矮果到都有成架半單層巴士咁高架!
其實室堂除左係有大雪谷睇之外, 呢到仲係比遊客可以影相0既最高點! 睇下個牌有成2390m咁高! (有幾高? 即係4個太平山咁高!)
不過我走時見到0的雪都溶得幾勁, 所以都明白點解限期觀光!
行完雪谷之後, 我地就離開室堂向大觀峰出發! 呢程車完全0係黑黑0既隧道行走, 無景好睇, 唯一景點係立山之峰 (即係立山山峰最高點) 個牌!
大概10分鐘0既車程就到喇! 但係果到實在太細太迫, 又無得出去行, 我地影左幾張相就走喇!
好怏咁又去到下一個景點 - 黑部平!
黑部平其實又係無咩0野睇, 行左個圈之後就去坐類似立山上美女平果架纜車落到左黑部湖!
出到站之後見到有架遊覽船咁0岩果日開, 但係我地決定出去睇下個景先, 再決定坐唔坐架船!
最後都係覺得麻麻, (其實呢個地方雖然叫湖, 但係其實係個水庫!) 所以決定唔坐! 寧願早0的返去名古屋行下百貨公司, 之後我地就跑住咁去撘隧巴走喇! (點解要跑? 如果miss左要一個鐘行有車)
黑部水庫模型
我地用9秒9極速時跑到閘口, 跟住比飛上車! 好快又離開左黑部湖向最尾一站扇沢! (果盒冒牌星之卡就係呢到買架啦)
不過落到扇沢呢個站再望返上出, 個山巳經比0的雲包住晒喇!
跟住我地就要買飛坐巴士去信濃大町再轉JR去松本 (呢一程第一次住JR), 再坐返去名古屋!
註: 信濃大町 - 只係一個好細0既站, 0的車唔係好密, 所以最好check清楚時間呀!
去到松本(呢個都算係一個幾大0既站), 所以有賣便當同手信0既鋪頭! 我地成朝都只係食得3個飽同1盒蟹柳, 見到0的咁0既鋪頭, 我地梗係立即買返2個上車食喇!
0係我買便當0既時候, 另一半0係側邊0既手信店見到呢0的0野, 二話不說就買左算數, 因為要趕車!
呢程車由松本去名古屋需時大約2個鐘, 不過車費就好貴! 要
5,870円一個人, 差不多$470港銀! 當然喇時間就係金錢, 如果你可以坐慢0的0既車, 相對平一截! 有班要3個半錢0既只要3,460円一個人 ($270到啫!)
一到左名古屋, 我地即刻去返高島屋shopping, 都買到幾樣0野, 最開心就係買到Agnis b新袋同一0的家庭用品!
買完嘢之後我地就去名古屋好出名嘅手羽居酒屋食嘢!其實我地第一晚巳經想去但係搵極都搵唔到,喺最尾呢晚終於比我地搵到, 而且仲一次過見到2間, 都唔好話唔邪呀!
為左方便定位, 大家最好由名古屋JR站向千里馬藥房相反方向一直行, 認住呢個喺頂樓嘅大招牌, 間手羽居酒屋就喺對面喇!
相信咁大個門口一定認到啦! 我地兩個等左一陣就可以入去喇! 但係由於名居屋o既人英文唔係咁好, 所以我地一入到鋪頭時問佢地可唔可以講英文時, 佢地個經理即刻話NO, 之後搵左個係廚房到負責整野食o既職員出黎同我地溝通, 話我地知要等一陣先有枱。
我地坐底左之後叫左個薯仔沙律 (好好食), 2碟雞翼 (佢個餐牌寫明1碟5隻for1個人, 個咪都ok, 不過冇咩特別, 都係第1日果間居酒屋好食好多), 醋青魚刺身 (好唔新鮮同好霉), 枝豆 (都不過不失, 亦都係第1日個間居酒屋好食d), 1杯啤酒, 同一杯蕃茄酒 (原來有成18度, 我唔係咁鐘意飲)。
由於佢地英文唔係咁好, 所以我地好多時都會用埋手勢, 由於佢地落錯左單, 明明叫左1杯啤酒, 就黎2杯比我地,
我地改左個沙律, 又黎錯左比我地, 所以我地埋單時都刻意check下張單有冇錯, 點知原來真係錯左,
所以大家記記得check單啦。因為呢餐食得唔係好飽, 所以我地就去左之前果日見到o既巴士拉麵檔到食拉麵!
由於又係溝通唔到, 所以見到人地食咩就指咩話比佢知, 後來叫左2個叉燒拉麵, 係豉油湯底, 但係睇到人地食豬骨湯底o既拉麵好似好食d, 仲叫左碟餃子 (幾好味)。
食完之後飽到嘔, 跟住就返酒店執行李, 預備最後1日o既行程。
