尋日去過終端之濱，令我哋對久米島嘅沙灘充滿霞想，所以臨時PLAN左今朝去EEF海灘游個早水先。我地7點幾就行緊去海灘 (隻錶係香港時間)。
因為我哋BOOK呢間酒店只係得素泊無包早餐，所以之前喺房到食些少嘢先出去游水。一人一個桃就係我哋嘅早餐！日本啲桃可以用四個字形容：香、軟、大、甜！
食完就人出發去海灘！
岸邊都係好多珊瑚，好拮腳！
去到發覺又受騙喇！首先尋日講過個沙灘有啲汚遭，周圍都有垃圾。而且啲水又濁，最弊係好大浪，攪到唔敢游咁出去。
雖然都有啲魚喺岸邊，不過真係好少同尋日喺終端之濱有好大對比。喺沙灘岸邊到HEA左一陣玩左陣堆沙就走，帶住失望咁返酒店梳洗。
臨走前影多幾張相，由酒店露台望過去EEF BEACH
另一邊係COCO
影完相就CHECK OUT去久米島其他景點。第一站去左酒店附近嘅疊石，呢到隔離就係深層海水浴場，所以入呢到電話就可以用GPS帶你揸車過嚟
深層海水浴場電話：098-985-8600
地址：沖縄県島尻郡久米島町字奥武170-1
有路牌指示邊到係入口
離遠巳經見到疊石
一掃全景
最衰遇正潮漲，所以影得唔係咁明顯
順路去埋A-coop，都係超級市場一間無咩好介紹。
如果想買久米島手信，例如久米島鹽，呢到係好地方。
我都喺到買左包，價錢平過國際通鹽屋一截，仲買左地產梅酒同其他調味料。
因為成朝淨係食左個桃，有啲餓，見到超市有熟食賣，即時買左啲嘢食醫肚！唔知係因為係新鮮整出嚟定係我地太餓，覺得好好食！
買左炸豆腐
同埋炸蝦
仲買左2個久米島芒果，不過無之前買到果啲咁甜
呢到見到我地成日用嚟餵魚嘅麵包，原來係比人食架，用嚟煮湯用。百幾円有咁大包，都唔明點解去浮潛果陣比得咁少我地餵魚！
開完餐就出發去五枝之松
呢到有間鋪頭仔賣啲久米島手信，所以入口佢個電話就可以用GPS帶你揸車過嚟
五枝之松 (五枝の松)
地址：沖縄県島尻郡久米島町字上江洲
電話：098-896-7010
其實都無咩人嚟，泊喺到果架車都係我揸嚟
再去おばけ坂，呢個地之前森美小儀個電視節目都有介紹，話望去就係上斜，實則係落斜。話如果空波唔落HANDBREAK架車會溜前，不過我哋試左幾次都唔WORK。去呢個地方有啲麻煩，因為佢係一條路，所以無電話輸入，我哋都係睇地圖加望路牌先去到呢到！
出嚟市區果陣見到有芒果直賣，於是就駛入去睇下，但係言語不通，老闆淨係識講句"SOLD"。無辦法，唯有走喇！
最後見仲有時間而且一陣又要搭幾個鐘船返那霸。於是我返尋晚住果間酒店附近搵個地方食LUNCH。今次去左間有人介紹過嘅餐廳叫「波路」。
餐廳入面環境
就喺我哋尋晚住嘅酒店對面。原本想點車海老刺身，因為呢到出名出車海老，不過比另一檯點左先（每日限量供應），我哋點果陣侍應同我哋講賣晒！
但係燒嘅就有，所以點左2份，炸得好脆可以連殼食
又係叫左例牌果兩味。豬軟骨麵同炒苦瓜。炒苦瓜炒得好老兼份量好少。
豬軟骨麵不過不失。
另外仲點左炸魚同久米島地雞加支無酒精啤酒，炸魚炸得有啲燶。久米島地雞同平時啲炸雞又無咩分別。
成餐埋單2,950円。唔係特別好食，所以唔會特別推介。食完就去入埋油還車。
原本只要揸到碼頭尋日拎車果個位，就咁擺低架車同將車匙及入油張單放喺車頭個櫃筒入面就攪掂，但係我哋遲左少少先到，個職員巳經喺碼頭上船個位等緊我哋，真係好唔好意思！
還好車之後就上船喇！不過回程唔比拎喼，要寄喺指定貨櫃，落船再認住個貨櫃去拎返。要記低個貨櫃NUMBER。
之後上船揾好位坐好，食下頭先喺A-COOP買嘅嘢又瞓下！好快就完左程船！
落船又係要比返張票尾職員。
之後就等個行李貨櫃出嚟再拎返啲行李。
由碼頭行返去美榮橋TOYOKO INN到CHECK IN。擺低晒啲行李就享受埋呢個行程喺沖繩嘅最後一夜。
我哋買左張MONORAIL一日劵，可以24小時無限任搭，我哋大大話話搭左無10次都有8次，抵返晒！
首先，我哋去左DFS站再行過去NAHA MAIN PLAZA。呢到其實幾好行，有好多衫賣又多化妝品賣。例如FANCL、SOFINA、HABA等等。
而且呢到又有個大超級市場，喺呢到買手信又齊又方便，價錢仲比國際通平！
行完又搭返過國際通行，去左少年JUMP專門店
食左芒果刨冰
喺鹽屋食鹽味雪糕同埋買洗面鹽
唔落啲調味鹽好食啲
國際通呢到有間賣年輪蛋糕好好食架，佢入面有得試食，可以試清楚先買
之後過左去「守禮」食晚飯。
MENU有介紹AGU豬同石垣牛
唔家唔使揸車，就可以飲些少酒
點左沖繩啤
瑞泉黑糖梅酒，呢到細細杯巳經要500 円。喺香港CITYSUPER見返呢隻梅酒都係賣百零，我哋都買左支返屋企。
點左餐之後就拎左下面呢兜嘢嚟，分別係水雲、麻醬豬耳、苦瓜
仲拎埋2個個爐過嚟
我地叫左一份AGU豬拼石垣牛燒肉餐，呢個餐喺中文MENU到無嘅
呢個就係實物，2種肉都好肥，一放上爐就著晒火，都幾難燒。
同埋一個AGU豬SHABU SHABU。
亦都係好肥，佢的確係少左陣平時食嘅豬膻嘅，不過無啲人講到咁好食。
2個餐都包個雪糕做甜品，一般喇。可能今日食得太多雪糕啦。
呢
餐埋單12,390円，我覺得唔值！餐廳環境OK，食物就一般，啲石垣牛同AGU豬又唔覺特別好食。而服務就更加要改善。漏左嘢無比我地，對唔住都唔講
句，錢又識照收。而且我哋燒到著晒火，啲侍應好耐先拎啲冰比我哋用嚟幫個爐降溫。再之後見隔離檯都係燒到著晒火，但係無人理添。
食完就慢慢行返TOYOKO INN，經過一間好地道嘅沖繩麵鋪。橫掂頭先喺守禮都唔係食得好飽，可以食多少少嘢，於是我哋就走左入去。
講真呢到好簡陋，啲嘢又唔係太好食，但係幾百円就有個麵，想點呀。而且呢到得阿婆一個人一腳踢做晒所有嘢，都體諒嘅！坐左陣就返酒店收拾行李準備第二日返香港。
