今日第2日我地要去世博, 之前果晚check-in果陣, 櫃檯比左個信封我! 裡面有2張車飛同一疊資料! 裡面有2張車飛, 只要我地拎住佢去指定地點上車就可以入場!
第二朝我地一早起身就去到國際賓館 (其中一個上車點)! 因為酒店無包早餐, 所以要食自己! 見到有間叫「東方既白」0既食店就走左入去食! 點知......
貌似快餐店0既鋪面
0的豆漿又淡又無味!
咸豆漿0的味怪怪! 食左一淡就無食!
最正常係小籠包! 但係0的皮厚左0的!
唔記得個全名, 好似叫培根蛋餅 (即係煙肉蛋餅), 但係我食唔到煙肉味!
呢間0野簡直係失敗中0既失敗! 唔知點解咁難食點解又好多人幫襯!
講返遊世博小小心得, 我地去果日萬里無雲! 大家最好帶定防晒同遮! 門外有大量小販賣遮同賣凳仔! 我建議唔好買凳仔, 因為無咩用!
另外入場方面, 張團體飛係跟酒店經Priceline訂0既, 但係個房價係會markup左, 建議大家可以直接上錦江旅遊個website到訂! 會平少少同多幾種唔同package比你選擇! 壞處係要自己預約參觀日期!
團體飛同散飛最大分別係有人帶經特別通道入埸! 免除排隊入場! 另外多數會幫你預約一個特定國家館(e.g. 我被安排去意大利館), 只要係預定時間去到門口, 導遊就會安排你入場! 完全唔使排隊!
講返我地果日去到行左0我咩啦! 我地去左一日都只係0係歐洲區活動, 無去到其他地方! 我地入左西班牙, 法國, 荷蘭, 盧森堡, 比利時, 意大利, 仲有一0的亞洲, 非洲同歐洲0既細國展館!
上面係我去過比較大型0既展館! 我個人覺得真係無咩特別! 例如法國, 意大利我以前去過, 但係入到佢地0既展館都比唔到果個國家0既感覺我!
另外提一提, 會場內有免費巴士穿梭不同展區! 盡可能都係坐車好, 留返0的腳骨力排隊好過!
食野方面都唔平, 下面2杯野飲2個包, 又洗左百幾蚊人仔。
不過, 我地就係食野個陣就發現有隻世博限定版O既保溫杯, 出面係冇得買O既!
仲有係會場內消費係比較高, 一支/杯飲品要10至30人民幣到! 大家其實可以帶定一支水, 安檢無問題比過0既!
特別一提有捷徑可以入一0的展館, 例如比行時! 條件當然係比錢啦! 當然唔係叫你比錢0的工作人員叫佢放你入去!
而係去佢展館入面0既餐廳用餐! 之後可以由餐廳通道進入館內! 我地叫左個套餐另再加一支啤酒! 好話唔好聽, 真係唔係咁好食! 埋單仲要二百一人仔! 我當呢餐0的錢當左係個入埸費! 唔使係出面排兩三個鐘!
行左成日都只係可以行左一個世博角落, 我地巳經好攰同埋夠鐘上車返今朝個出發地點! 最後走0既時候見到著左燈0既中國館! 幾靚幾有氣勢!
我地張團體飛包左旅遊車車返我地去出今朝集合地點! 可以唔使同人迫地鐵!
返到出去之後, 當然又係要醫下個肚啦, 我地就去左酒店附近採險搵野食! 搵左間叫"頂鮮"0既鋪頭食飯!
除左上面呢個叫招牌麵筋麵之外其他都OK, 可以接受! 價錢亦好平! 埋單只係39蚊人仔!
食完之後我地0係附近行, 搵到旅遊書都有介紹0既"小紹興酒家"! 呢間0野出名食白斬雞! 因為食完0野無耐食唔落! 唯有打包返酒店做宵夜!
0的雞好普通, 反而我地廣東人整得仲好食過佢! 反而碗雪菜肉絲麵(上海叫雪菜做咸菜)仲有驚喜! 雖然0的湯比0的麵吸乾晒! 但係都幾好食!
