去到最後一日嘅行程! 我哋留左喺名古屋!雖然今日只係要去一個景點 - 名古屋城!我地依然都係要早起身!七點幾就起左身喇!因為我地要爭取多啲時間買嘢(今次係我地去咁多次日本以嚟最少shopping時間嘅)!所以我地8點零到就去名古屋地鐵站放好啲行李!一路都好順利!咁早亦都有好多吉嘅大locker!
不過果朝落好大雨, 我地要拉住行李跑去車站!
我地擺呢個位有8個大Locker, 行去轉名鐵空港線大約5分鐘!
喺放好晒啲嘢之後,我地都向市役所站出發去名古屋城 (由於又係太早去到,所以要等一陣先開門)!
到最後一日,天氣都係唔係幾好, 除左朝早果埸大雨, 到市役所站時都仲有些少毛毛雨! 不過我地早左少少到, 要0係門口等佢一陣先開門! 要入場當然要比入場費啦, 盛惠500円啦!
因為佢成個城面積唔細, 都有一段路程要行! 未入到名城, 見到佢有個工地, 話會加建返一0的建築, 但係預算2017年先起好!
其實大家去名古屋, 都係想睇下佢呢條招牌鰤鯱魚!你去到名古屋邊到都會見到呢絛魚,就算地下叫人唔好隨處吸煙嘅警告字樣都會見到佢!
不過去到名古屋城我地就食返之前個晚係高島屋買o既精緻蛋糕! (成500円一件架!)
跟住仲去買左杯味噌雪糕試, 頭一啖好似怪怪地咁, 食緊咸o既雪糕, 但食落又ok bor
去完名古屋城都十點喇, 又係啲百貨公司開門嘅時間!我地要去"榮"拎前幾日去無印配嘅眼鏡, 真係好輕好舒服! 而且用千零蚊就配到一副Made in Japan嘅眼鏡!
原來無印啲鏡片係由兩間大廠供應!一間係HOYA (鋪頭入面所有備用嘅都係HOYA, 所以可以做到一個鐘頭拎鏡,我另一半就用呢隻), 另一間係Nikon(呢間一定要定,要3至5日不等,因我近視比較深,要求特薄,所以就用呢隻鏡(見下圖), 不過世上無免費午餐, 成副鏡要加多五千円, 即原價50%)! 抵唔抵就見人見誌啦!
咁好快速咁拎完眼鏡之後就順道去隔離高島屋買埋和牛 + 蜜瓜!喺香港買呢2樣嘢實在太貴喇!最平最普通嘅都要百幾二百蚊100g,但係果邊一半價錢都唔使就買到!
小插曲 - 唔知係好運定符碌, 我前面有個阿婆又係買我想買果種牛肉 (我想要果隻賣950円),咁我就讓阿婆先喇! 點知果個賣牛肉嘅阿姐就講左一大串日文! 我見佢收返個盤入工場以為佢叫我等一陣要切過比我, 咁我地雞同鴨講我唯有只好話: 「OK!OK!」
點知答完之後佢就拎喺我面先賣1000円100g果盤出嚟夾比我!哦!我先明白佢問我要一千円果種好唔好!我見950同1000都唔係差好多,咁就由佢喇!喺佢磅啲牛肉嘅時候,神奇嘅事發生喇!阿姐竟然係打950円入機而唔係1000!原來阿姐真正嘅意思係叫我要1000円嘅代替950円嘅好唔好!
買完牛肉之後最後就要趕返名古屋買埋Porter公事包! 因為仲有差唔多一個鐘就夠鐘去機場!喺呢個鐘入面我地要買袋 + 退稅 + 拎行李 + 買名古屋站去機場嘅特急車飛!可想而知我地又係要跑住咁做晒呢啲事啦!好好彩同好順利咁又比我哋完成晒所有嘢!最重要係趕得切班車,我地亦可以如期早兩個鐘到機場!
呢班就係我地坐果班車喇!
到左機場check-in之後,我地就行下個機場同埋搵嘢食!呢次嘅行程最遺憾係食唔到蓬萊軒嘅鰻魚飯!咁唯有喺機場揾下睇下有無得食啦!點知皇天不負有心人!比我地揾到間食鰻魚飯嘅鋪頭! 我地就叫左呢2款!
佢嘅食法同喺書睇到嘅差唔多又係有個大木碗裝住一大碗鰻魚飯,有壺茶有壺鰻魚汁!so far嚟講比香港好食好多!
喺香港食果啲會食到成口油好肥膩,但係呢到唔會!食飽飽之後我地就準備入禁區喇!相對東京同大板兩個機場禁區, 名古屋呢個都幾無嘢行無嘢睇!就連汽水機都無一部呀!所以我勸大家都係唔使咁早入去免得悶親!
上到飛機, 我地仲食左之前買果盒草莓大福! (大家見到一定要食, 好好食!)
希望好快可以又有機會同錢去旅行同寫Blog啦!
沒有留言:
發佈留言