北海道&東京遊@Dec 2009至Jan 2010 - 第3日 (登別 → 函館)

同第2日一樣, 我地都係去返「原始林」到食早餐! 之後要拉行李Checkout埋單! 2晚總共要49,700円(大約港紙$4,200)

跟住坐巴士落登別駅轉JR去函館! 車程要2個幾鐘! 可以0係車瞓返個覺都仲得呀! 一出函館駅望向右手邊就見到今晚會住0既Toyoko Inn個招牌(函館站前朝市)! 咁我地當然快快趣趣咁去check-in放低0的行李, 可以輕輕鬆鬆咁去玩!

0係去酒店途中見到呢張poster! 好靚好吸引!

擺低行李就立即出發去金森倉庫! 函館0既主要交通工具係電車! 好慢但係一0的都唔平! 每程最平200円, 最貴250円! 

 

其實電車公司出左一張One Day Pass比人可以全日任坐市內0既電車, 每個大人600円, 如果大家預計到果日行程要坐多過3次電車! 我都建議佢買呢張Pass!

好易用, 落車時show個pass比司機睇就可以!

離開酒店之後, 我地就坐電車去岸邊0既金森倉庫! 大家如果都係住函館朝市前Toyoko Inn0既話, 附近就有個好近0既電車站叫「市役所前」, 唔使行返去JR函館駅架!

去到十字街就落去, 基本上大部份景點都係集中係呢到! 落車後向金森廠庫方向行, 途中見到間餅店, 買左2件cheese cake。

我地買o既芝士蛋糕就係第二位o既~

我地買左一件原味, 一件麥芽味, 2件都好重芝士味, 同好滑!

行到咁上下, 肚餓就入左間拉麵店到食野, 佢地d鋪頭好早收鋪, 4點就關門架啦!

好多叉燒0既鹽味叉燒拉麵~~不過幾油!

每日限定50碗0既醬油拉麵, 但到關門前都仲食到, 唔知好彩定唔好彩啦, 但係都幾好味!

函館名物, 醬油煮魷魚筒釀飯, 好淋, 好入味!

之後, 我地由十番板行上去行左去八番板, 沿途有好多西式建築同教堂再加埋個雪景, 好靚, 可以影好多相!

去到八番板, 記住由呢個角度影返張相!

再夜d就上函館山睇夜景, 都幾多人! 不過記住0係酒店拎coupon, 記得好似每人減200円!

最重要架纜車係買左飛先再排隊上車呀!! 雖然在場工作人員不停用日文呼籲0的人買飛, 但好多人都唔知, 要買完飛再排過隊, 如果有英文廣播會好0的!

0係上面影左一陣間相, 之後就返去八番板影夜景!

可能我地果晚係平安夜, 所以門口點晒蠟燭!

影完相有0的餓, 所以我地行返落金森倉庫到食晚飯!

燒一夜干: 一0的都唔鯹! 連唔係太食魚0既我都覺得好好食！

海膽刺身飯: 好新鮮, 香港真係食唔到咁高0既質素!

什錦刺身飯: OK新鮮, 但味道普普通通!

叫左3樣野, 總共咁多錢!

食完飯, 再去金森廠庫再影夜景。條街都幾有聖誕氣氛。

影左一陣間相後, 又再作戰過, 去食宵夜, 今次去Lucky Parrot食佢個巨型漢堡包!

金森倉庫行過一條就見到

一入到門口就見到個招牌巨型漢堡包!

入面都幾多人等位, 等位時會落埋單先, 到有位時就可以快d有得食啦!

有成個义咁高, 送到黎o既時候, 個店員真係會搖手鈴, 成間鋪頭o既人就會望晒過黎, 都幾尷尬!

芝士薯條, 好熱好多芝士, 薯條好脆, 芝士味好濃, 好好味!

食飽之後就返酒店喇! 當然我地2隻蝗蟲返到房都梗係繼續飲飲食食啦!

北海道限定0既札幌啤酒, 比平時0既札幌啤酒好飲!

外表無咩特別, 但係呢個係糖度十三0既青森蘋果!