18天玩盡意、瑞、法、荷 (第9天: GRINDLWALD - JUNGFRAUJOCH - KLEINE SCHEDIGG - WENGERNALP - GRINDLWALD)

酒店包早餐，除左麵包之外仲有好多生果、火腿同芝士選擇。

今日要上少女峰，早餐要食飽啲呀！



呢個就係食早餐嘅地方，幾有瑞士FEEL，因為時間尚早，所以無人！

食 飽後就喺酒店RECEIPTION到買上少女峰嘅火車票，買之前講左呢幾日我地PLAN左會去嘅地方比老闆同老闆娘聽，再經過佢地計過車費，佢地建議買 JUNGFRAU CENTENARY PASS會抵啲，因為我地得EURAIL PASS，所以無折要比正價CHF225買！呢張PASS可以連續3日任搭少女峰鐵路(註：只可上少女峰一次)！



因為就快有巴士去火車站，老闆好爽快咁話計落房單到CHECK OUT先比，仲叮囑我地邊到搭巴士。

去到火車站巳經好多人喺到等上火車喇。

要搭呢架車上KLEINE SCHEDIGG先。

再喺KLEINE SCHEDIGG轉呢架上少女峰嘅列車

開車喇，呢幅係準備入隧道前影嘅，老闆娘真係無講錯，真係好好天氣！

入隧道之後，架車全程會喺隧道行車，無景睇！但係會中途停2次比乘客休息同習慣高山氣壓。

乘客可以留喺車或者行去觀景窗睇風景，我地選擇留返喺車上面。

上到山頂火車站，因為今年係少女峰鐵路100週年，所以有個介紹少女峰鐵路歷史嘅展覽。

之後去埋冰宮睇冰雕

無論Zermatt定呢個冰宮，入面都好鬼凍！跟住我地出左去呢個雪地，好晒好大風，不過可以對住成大個少女峰！

好多人都喺呢到以少女峰做背景影相。



仲可以影到好大條冰川！好想落去行呀！

呢到仲可以望到餐廳同山頂觀景台。

因為太冷同埋上嚟上得太急，我地兩個有啲暈。呢啲應該係所謂嘅高山反應，唯有喺餐廳休息一下，買左個吉列豬扒薯條，盛惠CHF20.8！

原本我地烚左啲腸同帶左麵包做午餐，不過無地方食，而且餐廳有人巡，成日同啲人講“NO PICNIC”，無機會拎出嚟食，只好偷偷地加2條落去碟豬扒薯條到。

食完休息左一陣，無咁暈我地就搭呢部電梯上觀景台。

差不多每位遊客都會影嘅背景。包括我自己都有影！

行出嚟觀景台，有種被群山包圍嘅感覺！

呢個觀景台有部分地方係凌空而建架，望落去係懸崖，都幾驚架！

之後就搭返車落KLEINE SCHEDIGG，行去WENGERNALP。

周圍都會見到少女峰列車開通100週年嘅LOGO！

話咁快就落到山喇，火車站隔離就係放牧嘅山坡！

好多人(包括我)都不停同啲牛牛影合照同寫真！

下面呢張係我其中一張最鐘意嘅！

啲牛牛好溫馴，行埋去影相得，埋去摸佢又得！有時佢仲會伸條脷"LAM"你TIM呀！

一路行呢條TRAIL都好多花花草草，亦好多烏蠅！可能因為多牛牛嘅原故。

原本想行去WENGEN架，,不過行到呢個站巳經用左3個幾鐘，巳經好攰喇！唯有放棄。

而且我地搭呢班車巳經係尾二果班，錯過左呢班可能要坐喺呢個好荒蕪嘅位等一個鐘等班尾班車！

我地搭車去到LAUTERBRUNNEN之後再轉車經WILDERSWIL返GRINDELWALD

返到GRINDELWALD，我地就搵地方食晚飯！

今晚就喺呢間酒店下面嘅餐廳到食！原來入左一間近火車站嘅餐廳，唔入由自何，一入到去周圍都係烏蠅，我敢話起碼有過百隻飛下飛下！所以即走，去左呢間。

先點左2杯大啤！跟住我哋慢慢嘆住啤酒點菜。

頭盤點左粟米片，佢有層芝士喺面，好香好脆好好食！不過好熱氣！

一路望住少女峰一路食住粟米片飲啤酒，爽呀！正呀！

佢呢到好好，你未食晒頭盤佢唔會上主菜比你，唔似得喺香港，一窩蜂咁上晒所有嘢比你，不停埋嚟睇你食晒未，食晒就執走晒你啲餐碟刀叉，務求盡快趕你走可以做第二檯客！

我地中間又影下相又飲下啤酒，食個頭盤都食左大半個鐘有多，啲侍應完全無比面色我哋睇！之後主菜終於到喇！經過尋日嘅教訓，我哋唔敢再叫瑞士菜式，叫左一個係漢堡包，另外叫左個燒雞胸拼沙律。

埋單CHF68 (HKD540到)，唔算太貴，！

不過呢到有樣嘢唔好，就係有烏蠅飛嚟飛去，仲要係趕極唔走！

跟住慢慢行返酒店，返到去老闆娘巳經準備好聽日國慶嘅裝飾喇！

同老闆娘傾左一陣間就返房沖涼瞓覺，準備聽日上FIRST！