18天玩盡意、瑞、法、荷 (第11天: GRINDELWALD - INTERLAKEN - BASEL - PARIS)

今日又係搭車日，要起程去法國巴黎。首先要由GRINDELWALD去INTERLAKEN跟坐再搭去BASEL再轉TGV去巴黎！不過出發前當然食返個酒店包嘅早餐先喇！今日係貓貓餐巾。



日日其實食嘅嘢差唔多，麵包呀、COLD CUT呀。

呢到好啲就係有埋新鮮生果食。

食完就返房拉行李CHECK OUT。

歐洲好多間酒店啲鎖匙都係咁，有舊好大好重嘅鎖匙扣，真係唔明點解要咁樣整鬼啲客?

CHECK OUT果陣，老闆娘送包餐巾比我地，仲拎左幾款出嚟比我哋簡，我地簡左呢款Heidi餐巾！

原本諗住搭巴士去火車站，但係老闆娘好好人，親自車我地去火車站！因為離下班去INTERLAKEN嘅火車開車仲有啲時間，我地去左火車站附近一間MAMMUT STORE，入面全部都係呢個品牌嘅登山用裝備，我喺入面都買左件T-SHIRT！

亦都係時候搭車去INTERLAKEN。呢張喺車上面影嘅，尋晚就落鬼咁大雨，今日就陽光普照，真係估佢唔到！

去到仲有大把時間，又喺INTERLAKEN買下嘢先。首先係買返把有指甲鋏嘅軍刀。

跟住去埋COOP買啲手信，買左瑞士限定嘅M&M同三角朱古力！

可能仲早，竟然比我地見到一排燒雞喺熱櫃入面。我地之前食唔到當然即刻買返隻嚟食喇！

原本訂左12點半嘅火車嘅位，但係我地早左好多到INTERLAKEN，見到有班10:30去BASEL嘅火車，即刻問個TRAIN MANAGER可唔可以坐啲呢班車，佢話無問題！我地就上車向BASEL出發。車出面一遍綠油油，好靚嘅景色！

上到車無耐就拎隻燒雞出嚟食，費事凍左渡好食！其實味道無啲網友講到咁好食，偏咸同之前買果隻燒雞脾差唔多味。

食飽飽之後當然瞓返陣喇，朝朝都鬼咁早起身，我地都會喺坐車果陣把握時間休息，特別喺瑞士呢啲治安比較好嘅地方，我地當然放心咁瞓！大概2個鐘就到BASEL，呢到就係出晒名嘅巴塞爾〈出晒名銀行都唔喜歡聽到嘅3個字〉。

諗 住博下可唔可以又搭早一班TGV去巴黎，走去問個TRAIN MANAGER，點知今次唔得，不過佢都比左個"好好"嘅理由：「佢話班車會為TGV頭等客人準備精緻嘅食物(FINE FOOD)，如果坐呢班就會錯過。」真係比佢激死！仲有2個幾鐘先至搭到下班車，咁唯有喺BASEL行下，打發下時間！

出到去走左一圈，無嘢睇，最麻煩係拖住啲行李，唯有返去站入面兜下坐下！

無無聊聊無嘢做唯有食嘢喇，見到MIGRO有個KABAB檔，買了個KABAB坐低慢慢歎，又幾好食!

食完個KABAR當午餐，仲有時間就去買杯雪糕做甜品！

朱古力雪芭，好濃朱古力味而且同雪糕質感一樣。

呢個係朱古力溝紅莓雪芭，酸酸甜甜好得意。

終於到左可以上車嘅時間。上到車根本就唔FULL，成卡車都坐唔滿一半。我地BOOK FIRST CLASS，有嘢食同有嘢飲，但係當見到下面呢啲所謂精緻食品(FINE FOOD)，真係唔知好嬲定好笑！上面個係生果杯，下面果個係檸檬TART，一啲都唔好食！

TGV果然名不虛傳，車速超過300KM(留意電話左下角)！只要3個鐘就去到巴黎。

架車去到PARIS GARE DE LYON，而我地住東站，所以要轉車去北站行過去東站，要拖住行李行成15分鐘先到。最慘就係附近有幾間IBIS，要花多半個鐘去搵間酒店！

我地住Ibis Styles Paris Gare de l'Est TGV包早餐，行李要拎一層樓梯先到有電梯上樓，不太近火車站，但近地鐵站，附近有超級市場同快餐店。但到最後果日呢部LIFT壞了, 要由4樓搬行李到地下。

房唔大，但入到去都算新淨！

廁所OK大，而且有浴缸，可以開熱水浸腳消除疲勞。

跟住就出發去奧塞美術館(Musée d'Orsay)，首先要去櫃位買Carnet (一本十張票)車票搭地鐵。美術館入面唔可以影相，我只可以偷偷地用手機影下個鐘。

我地太遲去到而且美術館好大好多展品，我地好快咁行左2個鐘都行唔晒。最後announce要關門我地先被迫要走，跟住沿住賽立河咁行過去巴黎鐵塔，原來都幾遠，要行差唔多半個鐘先到。

好多人呀，到夜晚10點都仲好多人排隊上鐵塔。唯有喺塔附近影下相就算！

搭左成日車又玩左成晚，好攰喇，係時候返酒店休息！但係我哋仲未食晚餐，因為住果到附近黑麻麻，而且巴黎治安都唔係太好，唔係咁敢周圍行，只好喺酒店下面間快餐店到食晚餐(咁夜應該叫宵夜)。

叫左個2人餐成$200港銀，食飽飽之後亦都返上酒店休息喇，第11日咁就完左LU！