18天玩盡意、瑞、法、荷 (第13天: PARIS)

4/8 羅浮宮(Musée du Louvre) → 亞歷山大三世橋 (Pont Alexandre III) → 巴黎古監獄 (Conciergerie) → 聖徒禮拜堂 (Ste-Chapelle) → 協和廣場 (Place de la Concorde) → 聖母院 (Cathedrale Notre-Dame de Paris) → 巴黎市政廳 (Hotel de Ville) → 聖心堂 (Basilique du Sacre-Greur)

羅浮宮

一早起身食完早餐就出發到羅浮宮，由酒店搭地鐵去只要7個站，地鐵站個名都係叫羅浮宮

出左地鐵站穿過呢棟建設局就見到金字塔地標亦即係我地嘅目的地 ─ 羅浮宮。

無咩人，唔使排隊啊。一入去就即去蒙羅麗莎先，位於DEMON展館。

已經超多人喇！

幅蒙羅麗莎原來係細細幅架咋，仲以為好似平時啲結婚油畫咁大幅。不過我地試左喺幾個角度睇，佢都係望住你笑！

除左蒙羅麗莎之外，仲有好多畫、雕像，如果鐘意藝術嘅人，可以由朝磨到黑都睇唔完！

我地喺入面行見好多人都拎住部NDS，原來羅浮宮係用佢嚟做導覽！

始終藝術唔係我地杯茶，行左差唔多2個鐘巳經有啲悶，所以出發去下一站，走果陣門口開始有啲人排隊喇 (排隊果邊係即場買票，唔使排果條係用MUSEUM PASS。

跟住我地行去巴黎古監獄，途中經過亞歷山大三世橋。

巴黎古監獄，呢到出名嘅原因係因為呢到係瑪麗皇后處死前被囚禁嘅地方。

呢到就係瑪麗皇后嘅囚室

之後去埋附近聖徒禮拜堂

呢到最出名嘅係佢嘅彩繪玻璃，真係好靚好宏偉！

接住我地去聖母院

排隊入去果陣，有人會兜售呢啲鎖匙扣，€1有10個，勁平！

呢到都係睇彩繪玻璃，不過無聖徒禮拜堂咁宏偉

LUNCH去返老佛爺到食生蠔。其實呢到係百貨公司入面嘅魚檔，如果住APARTMENT，可以喺呢到買返去自己整嚟食。我地點嘅生蠔、蜆、小龍蝦都係喺鋪面拎之後擺喺碟到送到我地面前。

先叫一個蝦湯一個蟹湯，我地覺得蝦湯好飲啲，蝦味好濃，相反蟹湯無蟹味。

又係麵包，不過用嚟點湯食幾好味！

點左杯HOUSE WHITE用嚟配海鮮，第一啖有少少DRY，不過食左生蠔之後飲會變到甜甜地，好得意！呢啲係咪「神之水滴」所講嘅MARRIAGE呢?!

先嚟個DEGUSTATION先！

呢個其實係樣樣有。不過唔知點解同個MENU有少少出入，佢有12隻蠔、4隻蜆、3隻螺、6隻蝦、3隻小龍蝦。蠔真係好好食，連同行平日唔食生蠔嘅人都食左半打，之後唔夠喉，再叫多打。

不過都唔知邊隻打邊隻，只係指住頭先食過覺得好食果隻蠔殼問店呢隻係咩嚟。



佢指一指個menu，原來頭先覺得好食嘅係GILLARDEAU No. 3，跟住同佢落單要多一打！

成餐埋單過百歐羅成為全個歐洲旅程最貴嘅一餐！！！之後去左A&F，條入場人龍超長，早知唔入啦，原來香港8月都開而且啲衫嘅價錢比法國平。

入去之前要行過一段園林石路

之後就有個男模喺門口，情況就好似香港A&F咁，佢好似人肉佈景板，不停同啲女顧客影相。入到去黑麻麻，好嘈，試身室又排長龍，後生鐘意去夜場嘅人會鐘意！

順路去埋協和廣場，景點一個無咩特別。

晏晝食得咁貴，晚餐食返平啲，返酒店附近食KABAB算，係之前買外賣果間。

價錢唔貴，佢比快餐店嘅漢堡包餐平

坐低例牌問你飲咩，我就例牌答要啤酒

點完餐又係例牌比兜麵包你，一定可以食飽你！

呢個係雞

呢個係ASSORT DONER，我唔識中文係咩，佢係樣樣肉都有啲，有羊有牛又有雞，味道還可以，2款都跟沙律、飯同薯條！超飽呢！

食飽飽要返去執好行李準備第2日要離開巴黎，向最一站阿姆斯特丹出發。