18天玩盡意、瑞、法、荷 (第15天: AMSTERDAM)

6/8 Floriade花展 → 安妮之家 (ANNIE HOUSE)

第二日

酒店早餐很豐富啊! 因為太豐富，掛住食，無影到出面有幾多嘢食！佢有好多選擇，有魚(煙三文、炸鱈魚粒)有蛋(炒蛋、烚蛋)有肉(COLD CUT、牛肉腸、、雞肉腸、煙肉)，仲有你估唔到嘅益力多。呢到係我地住咁多間酒店，早餐食物選擇最多嘅一間酒店，作為最後一站嘅酒店，真係好啱！

我地日日都簡呢個WINDOW SEAT坐，可以邊望住河景邊食早餐。爽呀！

早上主打去Floriade花展，呢個聲稱10年1次嘅花展！今次舉辦嘅地3喺VENLO，張車飛好鬼貴呀！成400幾蚊一個人！

去到VENLO火車站又要比錢買SHUTTER BUS車票！

每人比左三十幾蚊(€3.5一個人)！買左上車司機又唔CHECK又唔查！

拎住張飛，當然即刻去搭車喇！

坐左10分鐘就到會場，附近巳經掛花展會旗。

遠遠巳經見到花展會嘅地標！

一落車就見到色彩繽紛嘅花！好期待入到會場會睇到更多花！

跟住其他啲遊客行呀行，都行左5分鐘先去到售票處！

又比人鋸左600蚊入場費(€30一個人)！包一程吊車，唔搭吊車平€5。

其實同世博好似，入面由好多唔同嘅展館組成，有國家館、私人公司館。下面係中國館！

巴基斯坦館

斯里蘭卡館

尼泊爾館

呢啲係公司展館

會場入面仲有啲唔使錢比遊客玩嘅展品

亦有啲要比錢玩嘅展品

當然最唔少得嘅係「花」！

都有唔少花，有識嘅亦有唔識嘅！但係搵勻成個園區竟然連一朵荷蘭國花鬱金香都搵唔到！只有鬱金香椅！

有啲失望，無想像中咁多花。而且天色愈來愈差，好似想落雨，所以搭返SHUTTER返出去搭火車站！

又係搭返果部SHUTTER返VENLO火車站！

返阿姆斯特丹嘅火車仲有一段時間先到。當然要醫醫肚喇！喺阿姆斯特丹嘅快餐店好多時都見到呢啲保溫格仔櫃，有啲賣漢堡包，有啲賣呢款一條條嘅食物！

唔好食唔難食，可以放得入口，但係巳經唔記得係咩味同咩嘢質感！

仲買左個漢堡包餐配奶昔，可能因為肚餓，所以覺啲味道幾ok！

又搭左2個幾鐘頭火車終於返到阿姆斯特丹。喺去下一個景點之前"濕一濕"(SHOP)先！買返漏買嘅LONGCHAMP袋，貨錢同法國見到嘅一樣，不過退稅少啲(法國 - 12%; 荷蘭 - 10%)。

濕完就去安妮之家

條人龍勁長！我地又一時唔記得預約，排左成個幾鐘先有得入去！

呢棟建築物就係安妮之家，博物館建議遊客唔好影相，所以無相睇。

入場費€9一個人。

行完安妮之家就喺附近影下相

之前見網友介紹過CAU，好似幾好食咁，所以今日晚餐喺呢到食，CAU即係阿根廷文牛嘅意思。頭盤叫左個燒蝦，唔係太新鮮，麻麻地！

跟住2份牛扒嚟喇！第1份係厚切，第2份係薄切。個人覺得厚切好食啲！

另外配左粗薯條，喺歐洲食啲薯條真係好好食，一啲都唔淋，好脆！

呢餐埋單500幾，唔算好貴但係味道無網友講到咁好食。

食飽飽後又去紅燈區周圍逛！