18天玩盡意、瑞、法、荷 (第16天: AMSTERDAM)

7/8 風車村 (ZAANSE SCHANS) → 凡高博物館前 I AMsterdam → ALBERT CUYP MARKT → HEIENKEN EXPERIENCE → 性博物館

出發前梗係要喺酒店食早餐食到飽飽先出發！

我地今日第一站去風車村

要由CENTRAAL STATION搭去KOOG ZAANDIJK先

跟住再行過去風車村 (ZAANSE SCHANS)

一出站就有免費地圖，只要拉一拉就會跌一份地圖出嚟

沿住馬路一路行，離遠就見到風車

只要過埋呢條橋就去到風車村，但係好大舊雨雲等住我地

喺橋上面可以見到風車村嘅風車但係天色愈來愈黑

見到風車村歡迎你嘅牌代表我地巳經到達目的地

經過門口果幾間屋，見到無論荷蘭人或者外國人都好鐘意嘅MIFFY，當地人都會用MIFFY嚟做裝飾架

之後我地就向啲風車果邊行過去

點知比我地見到有群綿羊

我地用盡辦法引啲羊埋嚟，經過一番努力，終於引到一隻羊咩咩走埋嚟

隻羊走到我地前面不停咁左聞又聞，對我地好好奇！

無幾耐佢對我地無興趣，仲衰到擰轉身用個PAT PAT對住我地擺尾，好似同我地講BYE BYE你條尾！

繼續行過去睇啲風車，點知個個風車都要入場費，諗住入面都無咩特別，都係喺出面影下相就算。

跟住我地去芝士工場

又比我地見到第2種羊，我地又重施故技引隻山羊埋嚟

佢又真係走埋嚟同我地玩

之後真係走入去芝士工場，其實都唔係工場係芝士鋪比啲遊客賣芝士。

有好多唔同顏色唔同包裝，不過我地唔好芝士所以無買到。

無咩睇我地就行過隔離木屐工場睇下

呢到似返啲樣，起碼有啲展品講下木屐嘅歷史同唔同嘅用途。

現場亦都有示範，師傅會講解點將一舊木頭造成木屐

當然唔少得賣木屐比啲遊客喇，有好多唔同顏色亦有大人同小朋友SIZE，不過好重好大對。

如果唔買或者買唔到，可以出門口出面，佢有啲大木屐比遊客著嚟影相

其實風車村好細，如果唔入博物館，2、3個鐘咩都行晒！走果陣見到有間風車屋可以免費入去參觀，我地當然唔會執輸，入去逛左個圈。

我地入呢間風車屋係磨香料嘅，入面無咩特別，只係得啲磨同有大半賣香料嘅鋪面

天氣不太穩定，時晴時雨，攪到影啲相無藍天無白雲一啲唔靚，所以都係返阿姆斯特丹行下逛下仲好！

返到阿姆斯特丹都係烏雲蓋頂

電車喺阿姆斯特丹市內最方便嘅交通工具，類似香港嘅輕鐵咁嘅交通工具

佢有單程同日票，單程€2.7；日票€7.5，仲有其他種類嘅車票，有需要可以上官網睇睇。因為我地今日有好幾個地方會去，所以買日票會抵啲，用法好似八達通咁，上車要"DO"一"DO"，落車要"DO"一"DO"。

原本第一站係去MIFFY專門店 (Beethovenstraat 71 ,1077 Amsterdam)，呢個地址果間鋪頭巳經唔喺到，我聽就出發去歐洲嘅朋友講搬走左，如果弄次去要搵過個新地址。迫於無奈唯有去下一站凡高博物館前 I AMsterdam地標。呢陣天色好返好多，個天無咁黑喇！

超多人，想搵個空位影張相都有啲困難

見到好多人爬上啲字上面影相，我地亦都有樣學樣學其他人爬上啲字上面影相

影完相就去附近嘅Albert Cuyp Markt，搭2、3個站就到，如果腳骨力好亦都可以選擇行去。不過我地買左DAY PASS無理由唔搭架！一落車隔離就係市集入口，會見到生果檔同花檔，沿住行入去就係Albert Cuyp Markt。

啲士多啤梨又平又大粒，仲好香好甜！我地都買左盒嚟食。

隔離有啲平啲細粒啲嘅，不過既然去得旅行，梗係食靚啲喇！

生果檔對面有個花檔，都係見唔到鬱金香，注定係無緣見架啦！

再行前些少有檔賣荷蘭有名小食 - 鹽漬鯡魚，可以就咁要鯡魚或者配麵包，因為我地驚食唔慣，所以叫左配麵包嘅。條魚比鹽醃過仲配埋洋蔥同酸瓜，所以無左陣鯹味，少少地咁食都OK嘅。

呢個市集除左食之外都無咩其他特別嘢睇，所以我地都係繼續食。一路行之後見到有檔賣燒雞嘅，我地比佢嘅香味吸引，走左埋去。見到有好多後生仔買成隻雞嚟食，但係太HEAVY喇，最終買左兜雞肶嚟食，好熱好好味！

啲燒雞睇落好似好好食，如果有機會下次再去一定會試試。

下一站係HEIENKEN EXPERIENCE

入場必須滿21歲，入場費每人百七蚊(€17)！

會有一條手帶，上面有3粒褸，綠色果2粒用嚟換啤酒，白色用嚟換記念品〈不過唔係喺呢個展館入面換拎〉。

入面主要講HEIENKEN嘅歷史同不同年代嘅包裝、拎過嘅獎項、製造過程等等

亦有機會接觸以住釀製啤酒嘅器皿

亦都會有人講解製造啤酒嘅原料同秘密

仲有好多唔同背景比你可以影嚟留念，影完仲可以EMAIL去你個私人電郵戶口(完全唔使錢架)

之後當然有得試下新鮮嘅喜力，佢會教你要大大啖飲啤酒，唔好細細啖飲，如果唔係會有苦味架。佢亦會解釋點啤酒要有泡，都幾有趣！

跟住一人會派一杯啤酒，跟住MISS會GUIDE住大家一齊點飲啤酒。

飲完唔夠喉可以再過隔離用啲褸換啤酒再飲過

可以用2粒褸換一杯EXTRA COLD嘅啤酒(左)或者用1粒換一杯正常啤酒(右)

飲左2杯啤酒有啲飽，所以參觀完HEIENKEN之後我地都行下消化下啲啤酒

蕩下蕩下又係時間食晚飯，因為真係諗唔到有咩好食，是但入左間餐廳食意粉漢堡包，味道麻麻，所以無謂開名。

食完就出發去呢個旅程最後一個景點 - 性博物館，其實入面展覽嘅係啲咸書、咸相。

總之全部都係咸嘢，唔係露點就露械全部都係兒童不宜，所以無一張相可以POST出嚟！(我是但簡左張相再加左啲星星將啲不文嘢遮住，免得被投訴)

頭先餐晚飯唔係食得太飽，所以整返個薯條做LATE NIGHT SUPPER！講真阿姆斯特丹真係好多薯條專賣店，同埋真係好脆好好食！

最後一晚喺紅燈區行，成日都話紅燈區，係真係有紅燈架，呢啲燈柱就代表你巳經喺紅燈區喇！

真係唔知咩人會買呢啲衫著呀

DOM DOM都可以做裝飾

今晚係最後一晚，要早少少返酒店收拾行李，聽日一早就要去機場！