18天玩盡意、瑞、法、荷 (第14天: PARIS - AMSTERDAM)

5/8 去RENNES MARKET → 香榭麗大道 → 荷蘭

原本PLAN左去凡爾賽宮，但因為經過咁多日嘅旅程，巳經好攰，頂唔順咁早起身喇，只想舒服啲咁完成埋餘下嘅旅程。最重要係呢日係星期日，入場費FREE，肯定排長龍，又遠又要早起身，同埋又係睇畫，所以經過理性分析決定唔去，喺巴黎行下週日市集，休休閒閒。

首先係處理左啲行李，咁就可以輕輕鬆鬆行街，我地將啲行李放左喺LOCKER

用法好簡單，搵個吉嘅LOCKER，之後LOCK左佢，入錢，跟住就會有張飛印出嚟，上面有個密碼。要拎行李只需要入返LOCKER個號碼再入埋個密碼就可以拎返啲行李

出發去 MARCHE BASTILLE (巴士底露天市場)

佢呢到有好多賣生果、海產、熟食、蔬菜等嘅鋪頭，好多當地人拖住車仔買完跟住拉走，而我地啲遊客只可以即買即食。首先經過生果檔，好香士多啤梨味，我地都買左盒，好平又好甜！

無花果都好好味，好清甜！

跟住就聞到好香嘅燒雞味！又係好平，我地買左隻雞肶，不過凍左無咁好食！

見到麵包檔，佢唔只得法包賣，仲有其他香港麵包鋪常見嘅麵包款式，例如芝士條，買左條食，好軟熟，唔似平時食果啲法包咁硬，正！

之後見到好多網友都有介紹嘅蛋餅，我地買左件三文魚蛋餅(1件即係1/4個)，出事喇！件嘢凍冰冰，又唔甜又唔咸，食左1/3頂唔順要放棄！

喺到磨左2個鐘，跟住再去香榭麗舍大道到行，見到呢到啲鋪頭全部都開晒，同我10年前嘅情況好唔同，當年嚟咩都唔開，今時今日全部都開晒，而且成街都係人！

香榭麗舍大道果到有好幾間汽車SHOW ROOM，我地走入去好幾間果到影啲跑車同埋過冷河。

連LV都有開，勁多人排隊入去使錢！

見到啲鋪頭開晒，我地諗啲法國人係咪轉性，星期日唔休息呢，諗住行去LONGCHAMP睇下有無開門。點知真係無開！

內街冷冷清清同大街有極大對比。

行返出大道，又到食晏時間，但係諗唔到食咩，又見到前面有間LEON，就咁決定喺法國嘅最後一餐！

最後一餐當然要啤啤佢喇！

先嚟個頭盤，蝦條拼沙律，啲菜好唔新鮮，好似將人地拌碟嘅生菜儲埋一堆比我地咁！

當然唔少得青口喇！呢個最無走樣，水準最穩定。

仲叫左個海鮮PASTE，差到爆！啲意粉凍冰冰，煙三文又腥，蝦又霉！

呢個同青口一樣水準好穩定，我地ENCORE左幾次！

香榭麗舍大道呢間LEON啲嘢食嘅價錢係MARK UP左，比之前去果間貴少少，如果佢嘅質素可以保持，我絕對唔介意比果少少錢！但係佢實在太差喇！要BLACKLIST左佢！食完之後返火車站拎行李搭火車去荷蘭了！

今日搭TGV THALYS，架車超長又超多人，好彩一早訂定位，如果唔係實無位！

我地坐FIRST CLASS，佢係3個位1行，空間比較鬆動，無咁迫！

有免費WI-FI比你用



一上車首先每人派件WELCOME CAKE先。

仲有個WELCOME DRINK TIM。

之後仲有個晚餐，服務員一人比左一本MENU，我地每樣要左個。

呢個係意粉沙律，味道麻麻，又無咩汁，食左少少頂唔順唔食喇！

另一個係三文魚，啲配菜怪怪地，所以又係無食到！

經過3個幾鐘車程終於到阿姆斯特丹，但係天色巳經開始入黑！

我地亦都快快行去酒店CHECK IN，最後呢幾晚我地住喺DoubleTree by Hilton Hotel Amsterdam Centraal Station，好方便，佢正正喺火車站隔離，而且啲房好整潔好新淨。

安頓好啲行李之後，我地亦都出去夜遊阿姆斯特丹。

阿姆斯特丹周圍都係運河，隨便影一影都好靚。

我地完全無拎地圖，蕩下蕩下就去到紅燈區！真係好特別，但係區內唔比影相，所以靠自己去睇喇！

行去差唔多成12點先返酒店休息！舟車勞頓左成日成個人散晒喇！