食與玩的記錄: 2013暑假沖繩之旅行程 - Day 1 (香港

第一日主要係搭飛機由香港去上海再去那霸，不過因為去程時間麻麻，超早機7：30起飛去上海9點幾到再1點幾飛到那霸。因為唔知飛國內只要預早2個鐘到機場，我地曚查查早左3個幾鐘，即係朝早4點幾走去搭的士去機場！

(實際時間係4點7個字，因為我慣左隻錶計快左15分鐘)

去到咩人都無，呆坐個幾鐘個check in counter先有人嚟，佢個website同張e- ticket都無講，如果早知道就唔使人哋咁早起身同埋可以搭機場快線！

等到差唔多六點個CHECK IN櫃位先至開，整好晒所有嘢都係6點零，入去LOUNGE坐下打發下時間，7點零就行去準備上機，DELAY左幾個字，去到上海十點零，要等到點半先可以搭下一班機去那霸

又去LOUNGE到打發時間

呢到上網要拎ID同PASSWORD，好麻煩！

等左2個幾鐘至落去侯機室等上機，點知過晒鐘都未上得機！又無ANNOUNCEMENT，淨係要人等！等多差唔多成個幾鐘先至有得上機。

去到那霸果邊巳經4點半，唔使半個鐘巳經攪好晒啲過關手續同拎埋行李，不過沖繩個國際機場細得好緊要，比我地之前去過嘅沙巴、馬爾代夫機場(呢2個都巳經夠細)都細好多好多。不過佢地而家起緊個新國際大樓，應該下年用得。

之前睇啲台灣網友成日提及嘅"來來琉球"，喺過關出口有得拎，入面有好多COUPON，包括國際通嘅鹽屋、守禮等鋪頭，不過我地懶拎左都無咩點睇，一張都無用到。

出到去租車公司嘅人巳經喺閘口等我地，之後就帶我地去坐接駁巴士去租車公司攪手續同拎車。因為巳經好晏所以成架車淨係得我地一PAIR人。

搭左15分鐘車終於去到租車公司，又攪多15分鐘租車手續，要準備PASSPORT、香港同國際車牌，當然最重要係比埋租車錢同埋拎車。

(第一、二日唔記得影，呢張係第三日補影返)

溫馨提示：必需細心檢查車身有無花痕及損傷，如有必定要即時通知職員MARK低，我地租果陣個職員係咁"吹"我地，話只要REPORT明顯損傷，我建議唔好理個職員點講，有需要最好影低相証明租車時車身巳經有損傷，我地就係CHECK得唔清楚，太信個職員之後就有麻煩。

租車果到有特價入場劵賣，e.g. 美麗水族館、水果園、菠蘿園、琉球村、玻璃船等，如果有plan到呢啲地方嘅朋友可以喺到買定飛，慳返少少入場費。

拎車附近其實就係沖繩唯一嘅Outlet Mall ASHIBINAA，我地就順道去埋。不過入面無咩嘢賣，啲貨OUT OUT地同LEUNG LEUNG地，所以只可以買到件T-SHIRT。

之後見到對面有個超級市場同一間好大嘅100 YEN店，對面仲有間BLUE SEAL，見到好多人都話必食，即時走左去試，睇下係咪真係咁好食？

無想像中咁好味，個人覺得意大利嘅gelato比較好食。

跟住就揸車去那霸美榮橋站TOYOKO INN CHECK IN，每次去到TOYOKO INN都好似有返到屋企嘅感覺！

東橫INN 沖繩那霸美榮橋站
地址：沖繩縣那霸市牧志1-20-1
電話：098-867-1045

之前喺樂天訂左嘅跑鞋同B-MOBILE SIM酒店都幫我收好左，CHECK IN果陣跟手比埋我簽收。

開左對鞋嚟睇，係ASICS虎走特別版，真係好靚，有啲唔捨得著！

攪好晒啲嘢同擺好晒啲行李果陣巳經9點幾，係時候出返去食晚飯。行左陣好都諗唔到食咩，咁啱又離遠見到間「暖暮」拉麵。

暖暮拉麵
地址：沖縄県那覇市牧志2-16-10
電話：098-863-8331

又係好多人介紹同埋講到來頭好勁咁，咩九州第一。我地一人叫左一個拉麵同埋一份一口餃子。呢到有好多選擇比你，有粗幼麵、麵身要硬定軟、濃啖湯底、要幾辣。我地要左幼麵、普通硬度、一濃一啖湯底同埋少少辣。最重要係叫佢少油！ (用GOOGLE TRANSLATE翻譯少油 - "少ない油"，再比個侍應睇，佢明白我地意思，因為平時食拉麵，次次碗麵上面都有一層厚厚嘅油好唔健康！)