不過今日嘅目標唔係海膽飯。而係佢個沙灘，尋日揸車經過見到啲水好似幾清同埋個沙灘都幾多人。所以諗住今朝喺到玩返陣。
我地帶定水泡、潛鏡吸管同沙灘帳幕
啲水真係幾清
不過個岸邊就勁多珊瑚，勁拮腳，大家如果去最好著佢對鞋
但係出到去個海到就無珊瑚同無咩魚睇，淨係得啲草同沙喺個底
不過如果游到去古宇利大橋個橋底，就有勁多魚仔，一大堆呀！
差 唔多時間要走喇，諗住呢到會好似真勞田岬咁有沖涼地方，點知原來係無架，只有一個收費嘅露天公眾淋浴間喺廁所門口而且仲唔比用番皂。不過就平少少100円 有分半鐘水，我地係咁意過一過水就換衫，佢啲更衣室仲攪嘢，用木板搭出嚟，而且間間個門口都寫住係女子更衣室，唔知佢係預呢到無男人嚟定係叫啲男人露天換 衫。攪掂就揸車走喇！不過個天突然愈來愈多雲同黑。
途中經過今歸仁休息站，到左食飯時間而且開始落雨，所以決定喺呢到攪掂個晏晝
呢到啲西瓜好似幾出名，不過都幾貴，最平果個都成1,200円個，而且好大個，我地又無咁大把刀同雪櫃，真係無本事買嚟食！
呢到有個食堂，因為係食晏時間都FULL晒，等左陣先有吉檯。
同一個苦瓜炒豆腐套餐
全部都即叫整整，都幾好食而且都幾平，2樣嘢夾埋都係1,250円。食飽飽就繼續今日嘅行程，坐玻璃底船。由休息站揸過去大概45分鐘。
玻璃底遊覽船
地址：名護市喜瀨1744-1
電話：0980-52-3379
揸車果陣啲雨落過不停，但係去到目的地個天色又好返好多，陽光藍天走返出嚟。
玻璃底船同海中展望塔其實都係位於BUSENA Resort / 沖繩海定公園入面，揸車嚟會經過酒店閘口，只要同佢講去坐玻璃船或者去展望塔，佢就會叫你向左邊行。
泊好架車就行去RECEPTION，問佢架穿梭巴士喺邊到搭。
原來行前些少就到
之前喺租車公司買定嘅飛，特價1,200円，原價要1,500円。
穿梭巴士第一站就係停喺玻璃船果到，要行落去碼頭等上船
碼頭有標示今日海水嘅能見度
佢有一黑一白2隻鯨魚船輪流開，我地坐白色果隻
都幾多珊瑚，不過開頭都無咩魚
當個講解員放啲魚糧落去就唔同喇，啲魚走晒出嚟，仲要好多都有成隻手臂咁大條，如果浮潛見到咁大條都幾驚！
泡瀨漁港 (泡瀨漁港パヤオ直売店)
地址：沖縄県沖縄市泡瀬1-11-34
電話：098-93-85811 / Map Code：33565310
因為之前食左晏晝，個胃無咩空位再一人一個餐，所以叫一份2份食就算，我地點左1號餐。
有一隻龍蝦，盛惠2,800円。都幾好食不過食得多會有少少漏，因為佢個醬好濃又好油。
另外買左個鯖魚刺身，味道普普通通。
嚟左日本咁多日都未飲過奶，見到有，買返枝嚟試下先！幾香濃！
呢到仲有刨冰食，買左杯嚟試，唔係咁夠豆 (得面果幾粒)，麻麻地！
跟住要趕住返那霸美榮橋TOYOKO INN到CHECK IN兼擺低啲行李，仲要6點鐘去到DFS還車，所以快快食完就走喇。
還 車有個小插曲：先前幾日講過CHECK車要小心啲，唔好理租車職員點講，細心檢查車身損毀或花痕，如果有需要最好自行影相做証或要求換過第二部車。事源係 我租車當日，可能時間比較晏，去到佢地公司巳經過左佢哋辦公時間，當我CHECK車果陣向職員指左車尾2、3道花痕，佢就話呢啲小問題唔使MARK，仲不 停強調MINOR嘢唔使報，咁我又唔意思阻住人收工，就一時掉以輕心，是是但但望就算，點知還車果陣就出事。
還 車嘅職員話我撞爛左佢部車，個BUMPER甩左少少出嚟 (見上圖)，我哋都係還車果陣先發現。自問呢6日揸呢架車都係安安全全，完全無撞亦無"hide"花過佢部車。而且如果有撞過一定會有花痕架，但係我喺車 頭BUMPER位連一啲花痕都搵唔到。真係解釋唔到點解會咁。一係就佢部車比我果陣就爛左，唔係就係架車QC太差，行行下架車"鄧"爛左。同佢哋啲職員理 論左好耐，又話要我地去報警又問我地點解唔CHECK清楚就簽名，激到我地死咁滯！最尾佢話我地有買保險，叫我哋簽張「事故受付書」，喺上面寫返原因不明 及還車時發現，咁樣先罷休同解決左件事。呢件事教訓左我拎車果陣一定要細心CHECK車，千萬唔好信啲職員點講。另外仲一定要買保險，萬一有事都有個保 障！而且最好同返大廠租，以往咁多次都係同Toyota租，都未試過咁，就算第二日同日產租，咩事都無，今次貪平就出事！呢間租車公司我永遠 BLACKLIST，一世都會再用呢間公司。
還完車之後，去返頭先搵還車入口見到嘅藥房。不過都係搵唔到想搵嘅嘢！
跟住就搭MONORAIL返左國際通到行。見到有間卡樂B專門店，走左入去，都無咩沖繩嘢賣。
係得呢個特別啲，係炸紅芋(紫蕃薯)條。都幾油唔係咁好食！
行到咁上下又要搵地方食晚飯。見到有間餐廳個名幾得意同埋係個阿婆做招牌，咁就被騙左入嚟！
點左菜之後個侍應就擺低左呢2兜白烚意粉做前菜，好鬼死難食！
之前幾日都要揸車，所以唔敢飲酒！今日還左車唔使揸車終於可以飲啤酒LU！
叫左個炒苦瓜，炒得好核突而且成碟都係芽菜嚟得幾塊苦瓜咋。仲要唔好食嘅！
另外點左雙色薯條炸雞 (原本佢個MENU係寫雙色炸雞拼薯條，唉！)。
刺身拼盤，質素普通麻，唔係話十分特別
啲嘢食麻麻地而且頭先至食左個龍蝦餐都未消化晒，所以無加單，食晒呢到啲嘢就埋單走人，呢餐埋單4,090円。跟住就慢慢行返酒店休息準備聽朝搭早船。
沒有留言:
發佈留言