食與玩的記錄: 2013暑假沖繩之旅行程 - Day 4 (恩納

今朝落去酒店試左另一間食早餐嘅餐廳 - Aqua Belle。呢間同尋日食過嘅雲海一樣，都係自助餐形式。

人好多，要等左一陣先可以入去。

我地被安排坐左出外面一張4人檯。可以望到個泳池！我鐘意日本餐廳唔會為左做多啲生意或者增加人流而夾硬將2 pair唔識嘅人放落一張4人檯到，相反佢會好大方咁比張4人檯你2個人坐。

不過呢到食嘅嘢比較西式多啲

因為我地約左晏晝先浮潛同玩潛水體驗，朝早有一段空閒時間可以去多個景點。所以食完早餐就返房拎返啲行李check out。呢到2晚包早餐，價錢要¥108,800！我覺得唔值呢個價。同樣價錢夠我住2晚北海道嘅高級溫泉旅館！

離開酒店之後，我地出發去殘波岬。由酒店揸車過去要唔使一個鐘，但係距離真榮田岬只係十零分鐘車程，好方便我地一陣過返去。

殘波岬
地址：中頭郡讀谷村宇座
Map Code：1005685378*55

顯示詳細地圖

呢到好空曠，無咩建築物，得幾樣建築物包括一個燈塔（我地去到仲要圍起左，無得比人入）、銅像、小賣檔同個廁所。

說實話真係唔覺得有咩特別！可能我中午時間過得嚟唔啱，黃昏過嚟睇日落可能會特別啲。行完影完相就去左小賣檔。

買紅芋軟雪糕食！（紅芋即係我地嘅紫蕃薯）盛惠280円，都唔平！不過周圍得佢一間賣嘢，做獨市，想平都難呀！

跟住揸車返出去果陣又見到御菓子御殿，呢間係読谷本店所以門面靚啲。

御菓子御殿読谷本店
地址：沖縄県中頭郡読谷村字宇座 657-1
電話：098-958-7333

呢個蘑姑頂就係佢個招牌，好易認。

賣嘅嘢同其他分店大同小異，都係賣手信！

逛完之後就揸車過真榮田岬。

真榮田岬
地址：國頭郡恩納村真榮田471
Map Code：206062685*76

呢到有好大個停車場不過都幾滿同埋要收費，無記錯好似100円1個鐘。我地join左Natural Blue嘅 package。佢有中文、英文同日文介面。呢間嘢好多香港同台灣人幫襯，絕對唔使擔心雞同鴨講溝通唔到呢個問題。用英文絕對無問題！去到泊好架車之後行左個圈，諗住搵佢間鋪頭喺邊！Sorry！係無嘅！呢到係一間潛水鋪頭都無嘅，有嘅只係一間食堂、小賣店、廁所同更衣室。

於是我地是但搵左個教練嘅日本人，問佢知唔知去邊到搵到Natural Blue Yas生（呢個係老闆亦都係教練，我地就係同佢接洽嘅）。個日本人好好人咁帶我地2個去搵喇！佢帶左我地去一部貨van到，原來我地要搵嘅人就喺呢到！跟住我地就互相介紹同埋做最緊要嘅嘢 - 比錢！今次藍洞浮潛 + 潛水體驗成個package每人10,000円，呢個價包晒所有器材同裝備，你只要帶個人同換好泳衣就ok！

而且仲包埋幫你影相（原本我都有拎相機，不過佢話驚你整爛或者跌落海底，唔建議你帶相機去浮潛；而潛水就一定唔可以帶，所以影得唔多相，得佢寄比我地果啲
相咋），啲相會即日用電郵寄返去你指定嘅email address，寫喺上面張潛水聲明。Yas生之後比左份生死狀我地填（其實係一份潛水指引及說明）。

填完之後就要等埋其他團友先出發。佢簡單介紹啲裝備同用途，因為我地巳經浮潛過n次，所以無咩點聽！之後就出發去藍洞浮潛！去藍洞要行經過一埋礁石再穿過一個山洞先可以去到，教練會帶住你去。潛水地點就喺下面張相下方嘅海面﹝放大張相應該會見到啲人頭﹞。

行左唔使5分鐘就去到，而且藍洞入口真係好迫好細，要排住隊慢慢行入去，喺藍洞入面用得最多時間係等埋位影相！而且好細又多人，都無咩機會自己周圍游，沿住個邊游，去到下面張相個位，教練會幫你影相，會影到水面透出藍光，exactly好似下面張相咁。影完相就要走，因為好多人排隊！

(**相片取自Natrual Blue網頁 / Photo extracted from Natrual Blue Website)

之後游出藍洞，超級多魚！好似啲海洋紀錄片嘅畫面咁！真係好靚好壯觀！

藍洞出面啲魚都好大條

好快就完左個浮潛旅程，之後就返上岸休息一陣同換上潛水裝備，不過係喺陸上講解。最重要當然係講解啲潛水要點，好似唔好急速浮上水面、個口同呼吸器入水點樣清左佢等等。解釋完就要"咩"住個潛水樽(好鬼死重架)落樓梯同落海。落到海之後佢會叫大家試用個呼吸器喺水入面呼吸、又會check下個mask有無入水。之後就會慢慢潛，佢1個教練對2個人。潛落去都好多珊瑚同魚，特別係呢啲軟體珊瑚，有好多小丑魚。平時浮潛只可以遠距離睇佢地，而家潛水可以近距咁睇，仲可以餵佢地。

其實我地點樣控制身體浮或者沉，所以只可以好似BB咁爬下爬下

玩到3點幾就完喇，之後就返去佢架貨VAN果到除低啲潛水裝備，要背住個潛水樽上去都幾吃力。跟住大家就講BYE BYE，我地亦都要去沖涼梳洗，不過要提一提，呢到沖涼係要收費，200円2分鐘，我地就先搽好晒洗頭水沐浴液之後先入錢開水，啱啱2分鐘可以沖好晒成個涼。攪掂就出名去名護。

順路會經過許田道之駅，當然入一入去睇下有咩好嘢喇。之前見過有啲網友話呢到好多嘢食，係多不過係外賣囉！因為無食晏同玩完浮潛，有啲餓！入面啲餐廳又唔啱，唯有外賣都殺喇！買左啲魚蛋同薯餅。

好鐘意食日本啲魚蛋，好彈好足料！

包住成隻蝦呀！

走果陣先見到啲食沖繩嘢嘅餐廳，就走左入去食喇。

叫左個豬軟骨麵

一個苦瓜套餐

都唔知係我地太餓定係佢真係煮得好，我地覺得好好食！兩樣嘢埋單都係1,400円。

名護Super Hotel

Photo from Super Hotel official Website

顯示詳細地圖

之後又係時候去呢2晚會住嘅酒店。因為好似唔多人會住名護，都唔係點搵到有咩酒店推介，最多人介紹都係Super Hotel。我地以前都住過幾次，同Toyoko Inn差唔多。都係乾乾淨淨就不過係細細間房咁，特別係個廁所。其他嘢無咩特別好介紹！

比較特別係住酒店有雪糕送，上房之前Receiption姐姐叫我地喺雪櫃一人拎一個雪糕。

返到房擺低啲行李之後，我地又揸返架車出去睇下有咩行，大部份景點都係5點就關門大吉！

咁唯有去我地最鐘意行嘅藥房同超市。

買左啲沖繩茶同日用品。

仲買左盒菠蘿食！糖度有成15度（算係頂級甜）！

之後又過左去Aeon，想買啲運動嘢！點知咁啱經過間麵包鋪又有芝士麵包新鮮出爐！勁香就買左個嚟食！日本啲麵包真係唔知點解特別好食！

終於去到運動鋪，喺入面試下呢樣又試下果樣，咁就過左個幾兩個鐘，最後最左對跑鞋、一啲壓力褲嚟冬天跑步用、一啲防UV褲就夏天跑步防晒黑用！埋單買左差唔多萬九円。不過都抵嘅，香港一係就無呢啲款賣，一係有就個價錢比人mark up 十幾廿個%。買完嘢都成9點幾10點，又唔知附近有咩食，見到Aeon呢到有個小型food count，入面有2間鋪頭，廢事煩就食呢到算喇。

喺一間叫孫悟空嘅叫左一個拉麵餐。