其實呢部機台灣有出中文版，型號係105T，根據台灣網友講兩部機功能（同樣有30個品項）、產地（都係中國）及使用電壓相同（同樣行110V）。相差只係介面同個收納電線位。台灣機當然係繁中介面；日本機就係日文。而電線收納位係日本機獨有。
個人偏好買日本機，第一個原因係平啲，網上睇過台灣機價錢超過六千幾台幣，折返港幣近$1,600，價錢貴約$300。如果自己去開日本運費都慳埋！
第二係網上有中文說明書，有需要可以上台灣官網Download - Link。唔識睇日文咪睇中文版說明書，跟住㩒，包無錯！
第三係個電線收納位，對於我哋呢啲屋企細，用完要收埋部機嘅人，有個位收埋電線當然整齊啲。
正式折盒開機整麵包！
部機個樣, 基本上外表同台版一樣
所有跟機配件放於機內(除隔熱手套外)
乾果及酵母格
據網上討論區啲朋友講，部機最少要用500W火牛。而且必須係港產牛！如果用國產牛火數要大一倍去到1000W。不嬲幫襯開鴨寮街一檔鋪頭，同佢講就配左呢隻牛比我。價錢$300。
開機整包! 第一底做嘅麵包係提子包。幾香幾好食！同埋用呢部機無左陣麵粉味。以前用國產機，整出嚟啲包唔多唔少會有麵粉味。不過每次整包需時最少4個鐘，可以預約時間，但係唔建議夏天用，因為天氣熱，擺喺機入面嘅材料好易變壞。
試過幾底包，呢部機整出嚟嘅包係無陣粉味而且好好食！讚！呢底係今朝整嘅蜜糖藍莓包!
切開同食落去同外邊麵包買嘅無分別, 但係保証無添加化學嘢
如果有興趣可以買呢本書跟住整，本書個作者都用樂聲麵包機架，所以用返樂聲機整落差機會相對較少!
