京都、大阪、神戶、名古屋、奈良賞櫻之旅 - Day 3 (29/3) - 大阪 → 神戶 → 大阪

之前果晚喺心齋橋買左本當地旅遊書，介紹關西賞櫻名所，經過一晚嘅研究、參考網上櫻情報，決定今日去神戶嘅市立王子動物園，由大阪搭阪急去王子公園駅，再行5分鐘就到

另外比個小提示：喺櫻花季節，車站好多時都會貼出當地櫻花開花嘅情況，大家可以參考完先出發或者出閘

唔使拎地圖唔使問人，因為你會見到好多父母帶住啲小朋友喺呢個站出，佢地全部都係去呢個動物園嘅，只要跟住佢地行就得。不過我地比途經嘅王子公園吸引左入去，因為入面開滿晒櫻花，好自然就行左入去。

沿途都種滿櫻花樹

其實都開得七七八八喇

我地不停係咁影，影左差唔多成個鐘先行過去動物園，由側門望入去，勁多櫻花呀！

佢門口寫住一串漢字，唔使擔心自己去錯地方。

正門入口

入場費¥600一位，以日本嘅消費指數，一啲都唔貴，可以選擇門口自助買劵或者到櫃台買都得。

呢到有個好處，又有櫻花又有動物睇， 其實呢個動物園嘅規模同以前荔園差唔多，有獅子、老虎、大笨象、 猩猩、熊猫等等。不過大部份動物都係一隻起兩隻止，如果齋為睇動物而嚟就有啲悶同唔抵，但係夾埋櫻花就啱啱好喇。

不過要注意，入場費只包參觀動物園， 園入面有機動遊戲但係要另外收費，每人每次¥200到¥300不等，我地就玩左摩天輪。

每人¥300，記住要去買飛先。

憑票上摩天輪

我地玩摩天輪貪佢可以由高空望返成個動物園。

好靚！好似成個動物園都比櫻花包住咁！

接近中午時間，見啲日本人喺櫻花樹下再喺地下上面鋪張墊野餐。

好彩我地都唔執輸，喺車站出面間便利店買定飯團、蛋糕同飲品。 準備學當地人喺櫻花樹下食午餐。

喺入面行下、睇下嘢、影下相，咁就過左兩個幾鐘， 臨走果陣見到佢有櫻花雪糕賣，未試過當然即刻買杯試試。

其實無咩味，只係粉紅色嘅雲尼拿味軟雪糕， 又明白到點解無咩本地人買喇。

食完我地出發去下一站，去睇鐵人28號。呢個景點都係喺神戶， 不過喺一個叫新長田嘅地方， 由王子公園搭阪急出返去轉JR就去到，出左JR站沿途有指示， 跟住行唔使10分鐘就到。

上天橋

橋上面見到呢個人牌頭寫住"新長田1番街"

行到橋尾就會到1番石街, 成條街嘅街燈都係用鐵人28號個頭整成

只要跟住呢啲頭行, 就會去到鐵人廣場

離遠就見到鐵人28號好型咁企喺到, 之前睇啲網友個blog見到人山人海，但係我去到就無咩人， 可能今日天陰陰又有少少毛毛雨。

講返個鐵人28號，真係好巨型！啲單車拍埋去好似隻老鼠咁細粒。

呢到附近除左鐵人28公仔外就無咩嘢睇， 所以喺到影左一陣相之後就走喇，行過啲鋪頭見到生果賣，見到啲「 柑」好大個所以買左一份，只要¥300，我地即刻拎左個剝皮食。 發現「中招了」！原來唔係「柑」嚟而係「西柚」。 下次如果見到記住睇清楚問清楚先好買。

因為時間仲早， 我見到其他網友介紹附近有個三井垂水outlet， 入面有Levi's, Fred Perry, Beams等等大牌子（詳細shop list請參考官網）。我地立即出發搭JR去呢個outlet。 搭JR只需十零分鐘就到，不過因為剛走左部免費shutter， 唯有由車站行過去outlet就要另花15 - 20分鐘。

一去到outlet第一件事梗係食返個晏先喇。 去左間叫万太郎嘅餐廳食壽司，除左海膽好唔新鮮之外， 其他嘢都ok過得去。

行左2個鐘，都無咩嘢買到，淨係買左件衫同隻錶。 跟住就返大阪行梅田。去左Hep Five同隔離嘅EST，但係啲嘢無特價真係買唔落手， 終於都係返左去心齋橋行。

食左個八爪魚丸，好足料又幾好味！

晚餐返左酒店附近食拉麵。見到間叫「花丸軒」 嘅鋪頭好多本地人排隊，所以我地都排埋一份。（ 呢個trip唔知發咩神經，成日都想食拉麵！ 每日唔一次好似唔安樂咁。）

去到叫左個豬軟骨拉麵同鹽味拉麵，仲叫左個餃子！上菜喇， 味道OK無咩特別

最特別係啲本地人個個都叫炒飯， 我地當然都點返份試下，終於明白點解咁多人叫， 原來佢個炒飯真係幾好食！極力推介呀！

食完就返樓下夾下公仔。只係用左¥1, 500就夾到呢隻Chopper喇！抵呀！

之後又要返酒店plan下第二日去奈良嘅行程。