京都、大阪、神戶、名古屋、奈良賞櫻之旅 - Day 10 (5/4) - 名古屋 → 香港

一朝早又係落去食個早餐先。隔離左右有好幾檯香港人都喺到食早餐同埋討論佢哋今日嘅行程，雖然我巳經喺日本過左9日，但係仍然好羨慕人地可以繼續去睇櫻花 同喺到玩呀！而家可以做嘅就係盡量享受最後一個喺名古屋嘅朝早，去做最後衝刺！買衫、買士多啤梨、買麵包機。出發！第一站係過去近鐵Pass'e！貪呢到 夠晒集中（注意呢到係專賣女裝）！撞啱今日有新鋪頭開張，出面排晒隊等入去。不過啲衫唔係咁啱！反而喺其他鋪頭買左4、5件衫。

地圖

最失敗係唔記得拎張學生證過去，如果唔係買衫有九折！

頭幾日喺大阪高島屋買過啲士多啤梨幾甜幾好食，諗住去名古屋呢間高島屋買返果隻拎返去做手信比屋企人食。點知無得賣！唯有行返去近鐵百貨睇下有無喇！見到有而且ok靚就買左4盒。（不過後尾返到香港細心檢查先知有一盒係發霉架!）

原本想食走之前食返次矢場豬扒，但係去到排長龍，唯有放棄！喺附近搵左間叫＂千葉＂都係食炸豬扒嘅鋪頭！

始 終都係無矢場咁好食！食飽飽就去埋最後一站Big Camera。原來都係＂諗＂住買，去到見到部樂聲BMS-105做緊特價賣¥17,800！另外仲有銀聯（Visa都有呢個優惠）+退稅合共10%優 惠。即係折實¥16,020！折返做港幣唔使$1,300 (信用卡rate 0.08左右）。

上代P104香港電器鋪仲標緊$1,980，反而呢部新啲仲平啲，雖然要用火牛但係真係忍唔到手買部返屋企（注意：香港同日本電壓唔用，要配變壓火牛先用到，如果唔係部機會即燒報廢!）(稍後會寫另一篇詳細介紹 - Link)

買完就返Toyoko Inn拎返啲行李出發去機場。用埋張近鐵wide pass附送果張回程飛搭去機場 (頭先去近鐵百貨果陣巳經預先換定)！途經火車站入面啲便利店，順便買多幾個莓大福返香港！

去到機場順利check in。但係距離上機時間仲有個幾兩個幾，無所事事當然又去搵食喇！喺機場2樓有好多食肆同一個food count，兜左個圈最後都係決定食拉麵！間嘢喺food count入面叫＂一刻堂＂。

買完比左個BB機叫拎麵

是但叫左一人一個拉麵！味道普普通通！

每次喺中部空港返到香港，都會係矢場買外賣拎返香港做晚餐嘅。今次都唔例外！仲買多份豬扒三文治試下添！

夠鐘入閘上機返香港喇！過左海關之後都仲有嘢買！除左北海道薯條之外，而家有隻新產品 - 北海道薯粒（可能巳經唔新只係我之前未見過）。味道同薯條幾似不過佢用幾種唔同顏色嘅薯仔整出嚟，形狀唔同顏色亦都唔同！

另外特別提下大家，如果你或者你嘅旅伴係喺4月搭國泰而又係Marco Polo Club會員，喺機上面買嘢有9折。買SK2幾抵，只要$1,170就買到250ml喇！

返到香港成個賞櫻之旅正式完結！