去到我地先發現原來円山公有祭典，擺左好多小食檔，總之尋晚食完飯過嚟呢邊行喇！唉！錯過左！
真黑仔呀又天陰陰，不過啲花咁靚，我地都喺到影左成個鐘先走。
跟住行去祗園去埋鴨川同高瀨川。啲櫻花開始落，隨風飄落嚟再隨水流走！好靚！
之後我地行埋過去錦市場。呢到係睇其他網友介紹決定去嘅。呢到可以買到好多土產、小食、手信等等。
我地又喺呢到掃街！首先見到啲好大粒嘅栗子！佢分¥1,000、¥2,000同¥3,000三隻包裝，我地買左最細¥1,000果隻。講真咁大個人都未試過拎差唔多成百蚊買栗子架！佢有啲牌介紹自己啲栗子經過特別處理。我地試過真係特別易開拎入面粒栗子肉出嚟食。
後來又見到有檔賣魚餅嘅，我地又整左2件！一件咖哩味同一件蝦。幾彈牙幾好食！
經過大丸，買左盒士多啤梨做今晚嘅宵夜！
跟住返Toyoko Inn拎行李去搭嵐鐵上嵐山。就喺馬路對面，唔使擔心要拉上拉落搭車。由頭站搭到尾站，車程唔使半個鐘而且價錢平，每程只需¥200
地圖
到嵐鐵嵐山站出嚟拖住個喼過渡月橋同小渡月橋就到今晚入住嘅溫泉酒店 - 花筏。
但係去到櫃檯話要3：30先可以check in上房。唯有擺低件行李比reception之後出返去行。酒店前面就係嵐山公園，對住桂川，當然由呢到開放影起。原本桂川+櫻花+藍天係一個完美組合，可惜今日天陰陰仲要有啲雨，影啲相灰沈沈。
影到兩、三點都係食左個晏先，諗極都唔知食乜好，是但喺條街見到檔嘢就埋左去食。
間嘢唔係咁得，同自己屋企煮日本嘢差唔多，唔係！可能好食過佢！叫左個咖哩烏冬，見住佢將啲即食咖哩倒落碗烏冬到，心諗食即食咖哩使鬼嚟你到食呀！
另外叫左天婦羅蕎麵麥麵都差唔多，個麵係熱嘅，但係件天婦羅就唔熱，我估係炸定嘅。
仲叫左個熱豆腐。係好滑不過無咩豆腐味呀！
食完之後喺天龍寺同佢附近地方到行。
行到5點幾，而雨又愈落愈大。唯有早啲返酒店浸溫泉！返到酒店，行李巳經送左上房，補返個登記就有職員帶我地上房同埋介紹酒店入面嘅設施，仲備埋荼同糕點。亦安排埋今晚同聽朝幾點食飯。
呢邊係男湯
酒店呢到有按摩椅，我地浸完溫泉之後去左按一按，好舒服！舒服到瞓著左！返到房巳經擺好左啲餐具同menu準備食飯。我地當然坐喺到休息下，睇住電視等食啦！
呢幾日都未試過咁遊閒，通常都要趕去呢到趕去果到，返到酒店又要plan第二日去邊。無咩機會睇呢到啲電視！今日終於有機會喇！
睇下呢餐食咩先！
成日聽啲人講啲Sake點好飲又有幾好飲，我地都點左支地酒，叫左甘口嘅嚟飲！我地本身唔識飲酒，所以唔知道隻酒好定唔好！不過支酒飲落幾順，唔太辣喉嚨。
Compare上次住函館果間溫泉酒店食果個晚餐，果到用啲食材比呢餐好好多！(LINK) 仲以為起碼都有燒鮎魚或者蟹呀！點知2樣都無！
食晒成餐用左差不多兩個鐘。不過酒店好體貼，特登準備兩盒卷物比我地做宵夜！
休息左一陣就又喺房入面浸溫泉同埋諗下第二日個行程。仲有食埋今日晏晝買果盒士多啤梨！
沒有留言:
發佈留言