京都、大阪、神戶、名古屋、奈良賞櫻之旅 - Day 5 (31/3) - 大阪 → 奈良 → 大阪

今日係最後一日喺大阪，所以日間大部分時間都會留喺大阪市內遊覽同買要買嘅嘢。首先第一站去千日前道具街。原本諗住喺呢到睇下啲食物道具同模型，唔知係我 地行錯路定去錯地方，模型道具都無乜，反而勁多廚房用具，成條新填地街咁。我地喺呢到都執到寶，買到京瓷嘅陶瓷刨，Tokyu Hands賣¥1,890（就算有退稅都仲要差唔多¥1,800），而呢到只賣¥1,350。雖然可能比Amazon同樂天網啲價差些少，但如果計埋運費 就唔夠呢到平！我地仲喺呢到買左2隻木碗，貪佢唔傳熱，用嚟飲湯唔會辣手。

跟手過埋有大阪秋葉園之稱嘅日本橋，果到係有賣宅男figure同電腦零件嘅鋪頭，但係我覺得無秋葉園果啲咁大規模。不過喺果到見到嘅顧客無想像中咁＂宅＂。比喺電視劇同電影見到正常好多。不過呢區真係好多女僕CAFE。

我地順道去埋黑門市場，唔知係因為今日係星期日定啲鋪頭執左好多，經過好多鋪頭都無開門。大部份有開門嘅都係啲做遊客生意嘅鋪頭。例如賣即食海鮮、手信嘅鋪頭。

之 後返去心齋橋行藥房同去埋GU掃貨。有個小心得，記得買之前去唔同藥房格價先，有啲藥房賣藥品同日用品會平啲而化妝品可能會貴些少，另一啲就相反。好似我 地買馬油，一間賣¥1000，另一間賣¥800幾，相差¥200（十幾蚊港紙），所以記得格價做個精明消費者！同埋記得帶張銀聯信用卡，因為有啲鋪頭會比 銀聯卡戶多5%折扣。抵好多架！

晏晝又係返左酒店附近搵左間平民食堂，門口貼晒啲價錢牌好平呀。

呢 間嘢好似我地本地嘅茶餐廳咁，可以比人一邊睇賽馬一邊比人飲飲食食。啲本地阿叔阿嬸一坐低就拎份馬報出嚟，另外再點杯啤酒或者燒酒坐喺到睇電視直播跑馬。 呢間餐廳無中文或者英文menu，不過佢有圖片，我地睇到想食咩就抽出嚟，排好佢等店員看圖落單，跟住就等食。(但係點左個餃子無嚟到囉，仲想收我錢，同 老闆講無嚟先取消返)

啲價錢唔貴，味道無咩特別。如果唔係啲阿叔一路睇馬一路食煙，呢到都幾好坐，所以食晒之前點啲嘢就快快埋單走喇。寧願去第二到食好過好咁多二手煙。

之後返左酒店下encore果間拉麵店。唔知係心理作用定係師傅問題，硬係覺得無第一食咁好味。

跟住返上酒店房擺低啲戰利品同拎返部大機出發去大阪城！因為個近鐵Pass今日到期，諗住用盡佢，喺難波搭近鐵去鶴橋再駁JR到大阪城公園會平啲（只要¥120），點知喺鶴橋比JR條環狀線玩到氹氹轉。攪左幾個字先搵到啱果架車坐，去到大阪城公園天都黑埋。

黑麻麻，根本就睇唔到啲櫻花！淨係見到座大阪城！

原先諗住大阪城會有夜櫻大會，一時唔記得預先上網查，去到先見到Poster寫住4月頭先舉行夜櫻會。失望！橫掂嚟到無理由唔入去睇下架！入到去仲失望，又係黑麻麻，睇唔到又影唔到啲櫻花。

跟住諗返起尋日去過佐保川，知道果到有夜櫻睇，而且我地有Pass，搭車唔使錢，我地即刻趕車過去，因為果到夜櫻只係開到晚上9：30。由大阪城公園搭返鶴橋再轉近鐵向奈良方向喺新大宮站落車。尋日嚟過，唔使搵路，所以好快由車站行到去佐保川。

呢個就係夜晚嘅佐保川，都幾靚，不過我都係鐘意日頭睇櫻花多啲。雖然話9：30完，因為係人手熄燈，所以工作人員9：15會開始熄燈。千祈唔好預咁＂敏＂先去呀！

不過呢個時間去日本都幾蝦人，日頭如果有太陽可以十幾廿幾度，但係入夜後又可以跌到十度到，有時返風可能仲凍！所以褸都要帶兩件！但係今日唔知咩事好鬼凍，要買返罐熱朱古力暖暖佢。

跟住我地又返去酒店附近搵左間炭火燒肉。第一晚食過烤肉但係唔係用炭嘅，晚晚經過呢間鋪頭，門口擺滿晒備長炭，好吸引！今日最後一晚喺大阪，梗係要試試喇！

先點左2杯啤酒

再點多一份上等牛肉拼盤

牛味好濃，燒完仲有一陣陣炭香，好好食！



另外仲點左個石頭鍋飯，不過唔記得影，有啲把鬼！

得一碟牛肉同一兜飯又點可以塞飽我地呢，當然我地轉場再食過！ENCORE花丸軒！炒飯~~正呀！

特別提醒大家，可以叫佢個麵加底而且係免費。唔識講日文唔緊要，影張相落單果陣比餐廳員工睇就明白喇。

食飽飽當然享受埋最後一晚大阪嘅夜生活，就係去夾公仔！

今晚我地用左¥1,000就成功拎到呢隻CHOPPER喇！之後開開心心咁攬住佢返酒店，唔玩咁夜喇，因為仲要執行李準備第二日搬去京都。