京都、大阪、神戶、名古屋、奈良賞櫻之旅 - Day 2 (28/3) - 大阪

今日一早起身天陰陰又落雨，呢幾日都睇住櫻花情報又無咩進展，所以今日放棄賞櫻，改去「濕平」。行地下街、心齋橋筋唔使擔遮又唔使濕身！個人覺得日本啲街同鋪頭都唔會變得好多，幾年前同幾年後去都差唔多！

一落地下街就見到賣菓子嘅鋪頭，見到有莓大福（季節限定），當然唔放過！即刻買2個就地正法（食左佢）。薄薄嘅糯米皮，包住少少荳沙再包住粒鮮甜多汁嘅士多啤梨！好食到不得了！

行街啲鋪頭無咩特價，可能剛啱換季，最多都係9折，同一月七月嚟果陣好大分別。

晏晝去左天下一品法華寺店到食佢個特色味噌拉麵，招牌係一個太陽有個"一"喺中間。

叫左頂果個味噌同底果個味噌玉子拉麵。

之前睇啲旅遊書講到好誇張，話啲湯好濃好結，插對筷子上去都唔會跌，其實只係落左生粉水令佢結啲，無本書講到咁誇，而且啲味道無想像中咁好。我覺得傳統豬骨湯底好食啲添呀！

叫左個餃子，煎燶到呢......無嘢講！

之後過左0101果邊行，行完後過對面高島屋，落左去佢個超市買士多啤梨，¥1,280有2盒，好香好甜，比香港超市買平一半有多！唔食真係對唔住自己，所以我哋每晚都會食返盒，超抵呀！

另外仲買多左盒平啲嘅¥399，不過佢無上面呢隻咁甜。

見到剛剛有穴子壽司，即刻拎左盒，拎啲士多啤梨返酒店同時可以食埋佢當下午茶。

夜晚再去返心齋橋附近行同食晚飯，搵左間食大阪燒嘅餐廳，叫左個炒麵、大阪燒、枝豆同啤酒，不過發現遊客區食肆啲嘢偏貴，終於明白點解無咩本地人幫襯。

得果塊少少嘢又點會飽呢！我地行左一陣就去食拉麵做宵夜，去左間叫薩摩子嘅拉麵店就喺金龍同四天王同一條街，叫左2碗叉燒拉麵，等左一陣就有得食，不過佢啲叉燒超肥，肥膏超厚！

行左一日，早啲返酒店，準備下一日嘅櫻花之旅喇！