京都、大阪、神戶、名古屋、奈良賞櫻之旅 - Day 1 (27/3) - 香港 → 名古屋 → 大阪

今次張機票喺用Asiamiles換嘅，去程經台北轉機再飛名古屋。下面呢張相係台北機場等上機果陣影嘅，比我十件前去果陣新淨左好多。

去到中部空港，買左張近鐵PASS wide版(詳情)， ¥5,700包左機場來回市區(關西空港來回難波 - 南海電鐵; 中部空港來回名古屋 - 名鐵)，機場來回果程唔需要喺5天入面用，好似我咁頭尾10日用都OK，另外包5天任搭近鐵同埋3程特急劵。我地用左呢個PASS再轉火車去大阪。

但機場出名古屋果程只可以搭特急或其他班次，如果要搭RAPID要另補一位¥350，好處係快少少(7分鐘)同埋有劃位，其實平時搭特急就可以，但係因為我地要趕名古屋去大阪果班特急車，唯有要搭佢。

出到名鐵名古屋站要行去近鐵名古屋站再去櫃台劃位再上車。

但係特急都要2個鐘多少少先可以去到大陂近鐵難波站，去到大阪巳經天黑喇。快快行去酒店CHECK-IN，今次喺HOTELS.COM BOOK左FLORAL INN NAMBA，5晚只要$2,845.1，位置好方便又平。下次如果嚟大阪都可能會住返呢間。

但係啲房同啲設置有啲舊，同埋太多人住，有當地啲學生團住，半夜三更仲走嚟走去嘈生晒。

出發前，訂左張B-MOBILE 1G SIM for iPhone5 (nano sim) ¥3,980寄去酒店，check in果陣櫃檯將張sim交比我

可以14日內用1G DATA，不過無可能用到1G，因為好慢好慢，好多時地鐵隧道入面又收唔到，仲衰過香港啲2G台，用嚟WHATSAPP、GOOGLE MAP同查下火車班次都仲可以嘅，如果諗住用嚟SKYKE真係有啲"敏"。

折左包裝，裝入張卡同SET好APN就用得。

擺好行李之後就出去夜遊難波、心齋橋。

搭左成日飛機同火車，攪到好攰又好肚餓，所以決定食燒肉放題，出發前見好多台灣網友都推介呢間餐廳

嚟到日本無理由唔食和牛，A同B餐無，而D餐比C餐多左內臟，所以我地簡左C餐嚟食。

因為太肚餓，啲肉一上就係咁燒係咁食，相都唔記得影，只有未上肉之前嘅啤酒同餐後嘅雪糕。啲味道都幾好，最衰唔記得拎COUPON，可以一杯飲品送。

食飽後行左DONKI激安殿堂一陣就返去酒店休息喇。