京都、大阪、神戶、名古屋、奈良賞櫻之旅 - Day 8 (3/4) - 嵐山 → 京都 → 名古屋

一早起身，梗係浸返個溫泉先！

之後就梳洗換衫出去食早餐！個早餐都幾豐富，有燒魚、玉子、豆腐等等！

個豆腐好特別，要自己DIY。佢首先比煲豆漿，仲有一碗仔透明嘅液體，估計應該係鹽鹵。

煲佢幾分鐘之後就變成豆腐

佢比張綿紙你隔開啲水

好彩未食早餐之前浸左溫泉，如果唔係食到咁飽浸，我驚會嘔呀！返房休息左一陣同收拾好啲行李。我地就check out順便keep埋件行李喺酒店，可以輕輕鬆鬆繼續喺嵐山觀光。

天氣比尋日好好多，有少少藍天！我地即刻把握機會補返啲相！

但係好天嘅時間維持左唔係好耐，轉頭又變返天陰陰！

我地亦都出發去今日預定嘅景點。第一個係櫻花隧道。喺嵐山站買左日票，¥500一個人。



跟住就搭車出發喇！

搭嵐山本線返落去帷子ノ辻，轉對面嘅北野線。櫻花隧道嘅位置喺介乎鳴滝同站宇多野之間。

嵐鐵路線圖

觀賞櫻花隧道嘅最佳位置係喺第一卡車頭司機隔離果個窗口。一上車啲人係唔坐而係迫晒喺呢個位。我地唔知道邊到係靚位，坐左喺位諗住都睇到，但實情係車頭果個位最好最靚！

我地知道錯過左最佳位置，所以喺宇多野搭返一個站去嗚滝，過多次櫻花隧道（呢個就係1 day pass嘅好處，鐘意幾多次都得）。

見到有啲人喺路軌附近影相，我地就由嗚滝站行過啲民居去到路軌，可以影到電車經過櫻花隧道。

繼續行返去宇多野站，今次終於搵到個好位拍櫻花隧道喇！


之後就搭返上嵐鐵返上嵐山，喺嵯峨站落車，想行過去搭小火車。

幾年前夏天搭過呢架車，啲景全部都係綠色，好齋！今次諗住應該成個山都係櫻花啦！去到車站，最早出發而又有位坐嘅都要2：07果架車。唯有買完飛去食晏晝飯先啦。

行返出去嵐山站，搵左間叫＂稻＂嘅餐廳。佢係專食豆腐料理嘅。之前睇過啲台灣網友介紹。

去到喺門口等左一陣，職員就安排我地入去坐。一人點左一份餐。

唔係咁啱我地口味，成餐嘢都淡戌戌！埋單仲要成¥4,080。呢餐豆腐真係好貴！食飽飽就返嵯峨站搭小火車。個月台好細而且好迫！好彩係mark晒位，唔使擔心要爭位或者無位坐。

開車！車路沿途比想像中少櫻花，得路軌旁邊同山上面幾棵。原本諗住遍山都係櫻花樹，會好壯觀，點知原來唔係！

去到亀岡站落車，行過去馬堀搭返JR返嵯峨站！

反而JR站仲多櫻花呀！吹脹！

搭兩個站就返到嵯峨站，跟住要返酒店拎返件行李去京都。經過有間鋪頭賣一款軟雪糕，喺同一杯入面有5層唔同嘅味道！分別有綠茶、芝麻、八重餅、豆腐同櫻花味。見咁特別，梗係買嚟試試！

返 到酒店拉個喼去嵐鐵搭一個站去嵯峨，橫掂有日票唔使比錢！之後行過JR嵯峨站搭車去京都。每次去嵐山都經過一間鋪頭，佢門口擺左好多一盒盒嘅鰻魚、玉子、 煮物。佢有一味叫穴子八幡卷，係用鰻魚包住牛蒡再用醬汁煮。最緊要係唔貴，只賣¥420！對比佢啲鰻魚最平都要¥2,300，抵好多！

由嵯峨站搭去京都站要搭6個站，15分鐘。首先要拎返寄存喺呢到個大喼先，再去買埋新幹線車票去名古屋。第一次搭子彈火車，真係好快！半個鐘就由京都去到名古屋！

今次book左新幹線口Toyoko Inn。都幾近車站！過左Big Camera再轉過彎就到。

地圖

出發前喺樂天訂嘅嘢，巳經送到，職員喺我辦好check in手續之後就將件速遞交比我！真方便!

安頓好啲行李之後就出返去行。經過火車站，撞啱有人派咖啡試飲。難得我地遊客行過佢都派，當然拎返份啦。

第一站當然係去喺榮嘅Head Porter先喇！

地圖

之後再喺榮附近嘅地下街到行下。

跟住返去名古屋站行千里馬藥房。其實佢啲嘢比我地喺大阪見到嘅有啲貴，所以最緊要格價！呢隻洗頭水同護髮素香港巳經有得賣(雖然貴啲)，大家唔係喺特登買返嚟啦。

地圖

晚飯去左食雞翼！呢間嘢巳經唔記得係第幾次幫襯喇！佢啲雞翼真好香好好味！

除左雞翼之外，當然仲有叫其他嘢食喇！

食飽飽就返酒店休息同埋plan下聽日去邊到賞櫻。