搭一個站地鐵去大通站。
再喺35或者36號出口行去二条市場，呢條應該係喺路面行得最少嘅ROUTE。
起初唔識路，兜左個大圈先去到！
果到有好幾間鋪頭食海鮮，逛左個圈，結果都係去左一間叫「茶屋」嘅鋪頭到食刺身飯。呢間鋪頭好多台灣人介紹。入到去都未坐定，啲餐廳職員已經埋嚟推介佢哋嘅帶子。睇左陣menu，點左個至寶丼同一個三色丼、個都加左要靚海膽，每碗要加多500円，另外加埋個麵豉湯又每碗加多200円。仲加左一人一個燒帶子。
佢呢到無分大中細SIZE，全部都係細細碗！個飯碗只係比麵豉湯個碗大少少，合女性口胃，對男性嚟講，可能會唔夠喉！下面呢2碗湯都加左料，上面呢碗好明顯見到有魚蛋，不過同我哋食開嘅港式同台式嘅唔同，我哋係會彈啲，而呢到果啲就鬆泡泡軟淋淋。唔係咁慣呢隻質感！
下面果碗加左舊蟹，普普通通無咩特別！
個魚生飯啲魚生新鮮過喺釧路食到嘅，不過貴好多！埋單成9,000円！同我哋食2碗飯加一隻蟹差唔多價錢呀！
嘢食OK好食，只係價錢貴左啲！可能多數做遊客生意所以價錢會貴些少。之後兜左個圈去下面呢間鋪頭，佢有賣蟹、粟米、白之戀人同帶子好平的鋪頭。
返嚟食過都OK，食之前2日由冰格擺返落雪櫃下格解凍，不過記緊要用膠袋袋住，因為都會溶出幾多水嚟。1排蟹腳都夠5-6個人每人食少少（一、兩舊），不過就可以唔使咁漏。
仲買左甜蝦，不過到呢一刻都未食，所以唔知好唔好食。
白之戀人可以去機場買，除非你見到有咩咩限定或者比原價平5%，如果唔係去機場買都一樣價！
呢到啲粟米係北海道產！好甜！行勻成個市場呢間最平！
帶子無格價，不過同樣重量，機場賣5,000円。咁識喺邊到買喇！
買海鮮一定要用發泡膠盒加冰包包好（要另收費我哋呢到收左300円），店員會代勞包到靚靚方便搭飛機寄艙！記得要問下入面係DRY ICE定ICE PACK , 因為DRY ICE不能寄倉的!
行多個圈睇下有咩買返香港。如果要買薯條三兄弟可以喺呢到買，平啲啲！
仲有牛油薯仔！拆開包裝放入微波爐叮分半鐘就香噴噴熱辣辣，冬天凍冰冰時候食一流！
離開二条市場行返去大通站搭地鐵返札幌站TOYOKO INN拎行李去機場。
搭9點40分果班JR去機場，超迫！差少少連車都上唔到！要去到最頭果卡，仲要企門口企足全程車！好彩車程短只係三十幾分鐘。
去到機場CHECK IN，雖然要喺東京轉機，不過可以直接將行李直接寄返香港，唔使去到東京機場拎行李再寄過啲行李。但係買得太多重秤嘢，仲有啲海鮮，攪到行李過晒磅！原本都拎定錢準備比航空公司罰，不過個地勤姐姐好好人，比我哋拎咁啲行李HAND CARRY，最終唔使罰錢！
入到去候機室依然仲有使錢機會！大把嘢引誘你將銀包嘅円乖乖拎出嚟！
差唔多上機喇！
到東京要等到個幾兩個鐘先再搭機返香港。所以喺國內線機場搵左個地方食晏。叫左個蛋包飯同炸豬肉扒飯，仲有炸雞！味道不過不失。
再行下機場睇下有咩特別嘢買，見到呢個蘋果年輪蛋糕！除左蛋糕偏甜，整體嚟講幾好食！
差唔多時間要過國際線機場上機，要去8號站搭SHUTTLE，不過要留意有兩種SHUTTLE，一種只係來回國內線，另一種來回國內及國際線。小心搭錯！
到左國際線依然可以使錢，你繼續可以買到白之戀人、ROYCE同薯條三兄弟，不過無北海道咁多款式。不過就多左其他嘢比你選擇好似東京奈奈。買左呢隻長頸鹿款，我覺得唔及原味好食。
上機喇！要返香港繼續努力搵錢去旅行！
