2014農曆新年北海道之旅行程 - Day 5 (網走)

一早巳經喺網上面BOOK左最早果班破冰船，網頁寫要預早20分鐘去辦手續，我哋亦都有跟住做。CHECK OUT寄存左啲行李之後就出發，網走TOYOKO INN對面有架巴士去破冰船碼頭，實在太方便了。

但係去到破冰船櫃位，職員話今日NO ICE，只係會游船河睇風景。當然好失望！嚟網走就係為左睇破冰！不過既然唔嚟都嚟左喇，都去睇下啦。結果都係比錢上船！  

上到船，已經好多人，無晒位坐！見到有啲人2個人霸3個位，將啲袋擺晒喺啲座位到，啲日本人問可唔可以坐，唔拎開讓比人不突止，仲要大聲夾惡，真羞家了！

無位就唯有上舺板，全程都係上面，無想像中咁凍啊。船未開已經有好多海鷗圍住架船飛。

原本帶左包蝦條去餵佢地，其實係唔准架！所以餵左幾條之後，聽到廣播就無餵了。全程45MINS到，只有碎碎嘅浮冰咋, 好失望。   

如果可以好似呢條片咁就好LU！

不過不得不讚下日本人，好識做生意。整啲特別席，另加可以賺多400円。

仲有好多流冰主題嘢賣。

之後再搭車去網走監獄。

TOYOKO INN果到有優惠券，入場平少少。如果住TOYOKO INN記得拎呀！

我哋諗住早少少去サロマ湖鶴雅リゾート溫泉酒店，其實1點幾同2點幾都分別有架車去嘅。 

由TOYOKO INN拉喼去返碼頭才知架車係一定要BOOK，而且要早最少2日，我哋無BOOK臨時去碼頭嘅旅客中心問當然結果係無喇！攪呢攪路攪到1點零。唯有食飯先。喺碼頭2樓有個FOOD COUNT仔。

點左個拉麵同刺身飯。味道普普通通。總之過隔離食蕎麥麵好過！

喺碼頭附近行左個圈，去埋碼頭附近嘅流冰硝子館，無嘢睇嘅！

仲有段時間先夠鐘搭4點果班巴士喇。所以我哋決定返車站前逛下。如果一早知無得搭果班車，就會PLAN去網走湖到行下啦。之後喺TOYOKO INN 2號巴士站搭車去。喺站前果間LAWSON行下睇下兼買下食下，咁就消磨左個幾鐘！

搭車位置好近TOYOKO INN，就喺SUKIYA牛肉飯隔離。車到喇，上車！

要搭個幾鐘頭先去到。呢架巴士都無咩本地人搭，得我哋同另一對日本人係去到鶴雅，其他乘客都係去船長之家。

沿途愈走愈荒蕪。

去到鶴雅リゾート溫泉酒店已經是5點幾了, 原本係房到可以睇到個好靚既日落，又錯過了。   

去到鶴雅リゾート溫泉酒店CHECK IN
 

拎到房就立即上房換衫去浸溫泉。

最特別係房入面提供即磨咖啡，可以隨時整杯咖啡飲。

浸完返入酒店房時, 竟然又撞到朋友了, 是以前大學的同學啊, 天呀世界真係細~~~~~。呢到有兩個露天溫泉。

一個喺地下, 另一個喺二樓。地下果個係和式，用天然石圍住，不過有啲細同埋佢有個頂，就算落雪的都不是太有FEEL，不過尚可以接受。

《以上相片取自酒店網頁》

但係二樓果個西式池，好似按摩池咁大，又無景，真係麻麻！

 《以上相片取自酒店網頁》

無之前喺二世古同登別浸嘅咁好。值得一讚嘅係佢呢到提供2條鎖匙比住客，一男一女分開浸都不用等埋一齊先可以返房了，這樣方便很多。

之後就落去食自助晩餐了，食物好過TOMAMU嘅HAL啊！不過都係無想像中咁好！

最好食係呢個南瓜沙律。

蔬菜亦都好鮮好甜！

食飽之後行多陣酒店呢到嘅手信店。跟著去浸多次溫泉，真係好舒服，返房再嘆返杯啤酒！一流呀！ 呢隻啤酒無咩特別，都係整色整水，都係SAPPORO CLASSIC好飲啲！