今次去東京6日，主打係買買買買買，買護膚品、化妝品、買出街衫、買返工衫同買阿女啲嘢。拎左半個細喼嘅嘢去，返嚟就爆左個大喼加細喼。
去之前已儲左一堆奶，等呀女有足夠既食糧，今次儲奶無之前咁辛苦，因為由1日5餐轉3餐，每餐6-7安，數量少好多。我哋今次行程都訂得幾急，原本想零晨機去，晏晝機返。最後驚頂唔順，變返早機去晏晝機返。始終人年紀大左，唔似啲後生可以咁博。搭國泰9點15分機，去到東京成田2點半。
過關同行李都好快手。唔使3點巳經攪掂！之前上網做左功課知道機場有sim卡賣，出左海關就即刻去搵鋪頭買多張上網sim卡。
好彩之前喺香港買定一張低用量卡7日4G每日有100M，都係$130。用嚟whatsapp下、上下facebook同查下地圖，都ok夠用。原本諗住過嚟買多張，咁可以分開行街，之後都容易啲聯絡。點知間鋪頭得2款sim卡，張張最低都要1G起表，而且要成4500円維起嚟差唔多$300。
無法都焗住要買！最後買左呢張。
之後就去埋隔離買埋張來回NEX車飛。4000円來回新宿都幾抵！
以前搭京成電鐵經上野都要2千幾円，中間仲要拎住個喼上上落落，去果陣個喼無咩嘢都仲可以，走果陣爆喼先死呀！雖然車程耐些少，但係mark晒位，唔使爭坐足全程，舒舒服服！
搭左個零鐘出到新宿，即刻過新宿Sunroute check in。
因為今次太急巳經訂唔到Toyoko Inn，而且近呢幾次住Toyoko Inn都唔係太舒服，成日覺得張床唔乾淨，好痕有嘢咬咁。所以今次揀返呢間酒店，真係幾方便。如果搭地鐵，隔離就有個出口，離JR站就遠少少，要行5分鐘到。上房放低行李都巳經5點幾，但係仲未可以出去行街住，首先要泵一泵奶先，一來要keep住有貨比阿女食，二來又無咁谷咁辛苦。同一時間老公就落左去酒店斜對面間FamilyMart買少少嘢食。買左2個飯團同啲關東煮。
攪呢攪路出去行都巳經差唔多成7點鐘，第一站係去小田急個超級市場到買生果先！6/7月係食桃嘅時間，啲桃又香又甜！而且價錢唔貴！3個大桃都係1000円！
抽住啲生果去左新宿啲地下街到行。但係今年日本經濟好左，好幾間百貨公司同商場都遲左減價，要去到7月中先開始，好似Lumine、伊勢丹、高島屋等等。但係亦都有啲6月尾7月頭就開始減。例如Alta、Mylord、小田急同京王百貨等。詳情可以參考呢個網頁：http://bargain.enjoytokyo.jp/phones/tokyo.html#shibuya
大部分商場同百貨公司都喺8、9點就收鋪。唯獨有少數鋪頭會繼續開門，其中一間係BICQLO。呢間係混BIC CAMERA同UNIQLO為一體。UNIQLO香港有我就唔介紹，我嘅目標係佢位於7樓嘅GU，除左佢啲嘢平靚正之外，最緊要係佢開到夜晚10點，而且仲可以免稅。 買左一大袋衫之後就去左搵嘢食。諗唔到食乜嘢，諗起博多天神嘅豬骨湯拉麵。就走左入去食喇。叫左碗多叉燒拉麵同多蔥多叉燒拉麵。感覺無以前咁好食，可能一來太咸，二來可能係食過日本其他地方好食嘅拉麵，好似大阪同北海道嘅。
食完個拉麵覺得意猶未盡，咁啱酒店附近有間磯丸水產，見好多人都推介，就入左去再食過。諗左陣就叫左個燒貝類、燒魚同吞拿魚刺身，再加2個啤酒。轉頭侍應放低幾條魚同兩塊魚餅。
啲貝類喺魚缸養住，所以好新鮮！
埋單六千円到！啲嘢幾新鮮唔算貴。
沒有留言:
發佈留言