今個行程係shopping trip，呢日當然依然係去買嘢啦！今日目的地係原宿竹下通、裏原宿。
JR搭山手線兩個站就到。一出去就係竹下通！
竹下呢到依然賣好多𡃁妹嘢！唔知幾時香港有呢啲賣呢？
呢到啲鋪頭多數都11、12點先開門，所以唔使咁早嚟！喺竹下通Pariskiss買左啲嘢之後就再買唔到嘢啦。唯有買返個法式夾餅嚟食！
跟住行過裏原宿，主要係去Head Porter、Bape、Kicks Lab、Onitsuka Tiger等等。
除左Head Porter同Kicks Lab買唔到嘢之外，喺裏原宿間Bape同Tiger跌左幾萬円！
買到一袋二袋，一路行行行到過去Laforet。
呢日Laforet仲未有Sales，啲嘢買唔落手，結果呢到買唔到嘢，行都都巳經係食晏時間，行左過去渋谷，諗住食另一間人氣壽司店「梅丘美登利」，我哋去左西武上面果間梅丘美登利回轉。
去到排幾個就到，同前日去嘅「根室花丸」比排短好多，亦都無咩日本人嚟食，多數係遊客。
起初我哋以為過左食晏時間所以唔使點排隊，食過就知原來唔好食嘅。 除咗佢呢到用火車來送食物之外叫做比較特別。
呢到啲嘢無咁新鮮之餘價錢亦都比之前果間貴，呢間無下次！
過到嚟渋谷亦都順道行下呢到，去左喺Parco Part 3嘅Jellybeans專門店，喺到終於買到嘢，仲要一次過買左兩對鞋。走果陣見到有啲好得意嘅卡通襪仔，買左3對比阿女。
把握時間，我哋要趕過去日本橋一間批發店，由渋谷搭地鐵去馬喰橫山站，再行過去5分鐘就到。呢到要有會員證先比入，一證兩人，話就話呢到係批發，但係買一件都得，上至洗頭水沖涼液，以至化妝品護膚品，甚至名牌衫同袋都有得賣，價錢可以比街價平3分1，喺到又使左幾萬円。行完批發，時間都仲未到6點，而且呢到離上野亦都唔遠，一卡去埋上野「二木之菓子」買埋啲手信。
推介買黑之雷神，除左呢到買嘅大塊啲之外，個包裝亦都無咁嘥位同阻定。上面果款係上野買，下面果款喺機場買，仲有機場買果隻好似無咁好食！
另外亦都喺到買左幾包帶子送比屋企人。走果陣經過果到啲生果檔，佢哋都好似香港咁臨收檔會賣平啲，佢一兜桃有7個都係賣800円，雖然係比平時百貨公司買嘅細些少，不過平好多！
買左好多嘢亦都好重喇，唯有先返酒店放低今日嘅戰利品先至再出去搵食。因為好攰所以去酒店隔離嘅一間炭火燒肉店到食。
叫左2碟和牛、1個餐同2支啤酒，埋單成萬六円，都幾貴下！味道可以嘅，不過要我形容呢餐，我會用貴夾唔飽嚟形容佢。
食完再出去行下，喺BICQLO見到有BB車前面個扶手嘅套賣，毛巾質地，可以包住唔比BB咬到啲膠同埋可以用完拆出嚟洗。另外再好藥房幫人買嘢，亦都去左100円店睇下有咩新奇又有用嘅嘢。宵夜我哋去左新宿嘅一蘭拉麵，都幾好食！
沒有留言:
發佈留言