嚟到行程嘅最後一日先嚟落雨，都算做好彩。我哋朝早去築地市場。主要係想去買桃返香港。由新宿搭地鐵去築地大概要20分鐘。去到再行去場外市場再要多5分鐘。
嚟到呢到都做返啲遊客嘢，食下即造甜蛋同魚餅。兩樣都麻麻地。
之後去埋壽司清到食早餐。我哋坐吧檯，點左個set同散叫左幾款壽司。
啲魚生係幾新鮮，不過食唔出同根室花丸有咩大分別，反而因為我哋唔識日文，食回轉會比較方便。
食完就去到行左個圈搵生果檔，唔係有好多間有桃賣，係得一間比較有規模。喺果到買左箱桃同蜜瓜。結果我哋寄左3個蜜瓜喺艙，另外手提箱桃上機。
啲桃好靚好大又好甜，阿女食到好滋味！
買完生果就返酒店check out，暫寄啲行李等我哋可以喺新宿作最後衝刺。因為尋晚喺emporium睇中兩件衫，諗住喺Mylord到買會多啲折頭。之後順便去埋GU買牛仔褲。因為要去到6點幾機，到時先有嘢食，所以喺地下街搵左間食十勝豬肉飯嘅鋪頭食晏。味道都算過得去。
食完返酒店拎行李去機場順道經過京王百貨，上去童裝部睇睇，點知見到有日本版童裝New Balance，而且仲要有特價！之前一路都搵唔到，竟然最後一刻先比我哋搵到。
買完要趕住返酒店拉喼去JR站。換左2點半果班車，去到月台見到2:10果班未開，我老公諗住上左先早啲去機場。點知我衰多口走去問個車站職員可唔可以上，佢就話唔得，一定要下一班，唯有喺月台等多半個鐘。但係佢個網頁話可以，只不過如果個位有人mark左就要讓座，廢事拗乖乖哋等半個鐘算數。等車無聊影下我哋回程嘅行李！不過，好彩搭返2:40果架車，因有沿途上車既人都好多，如果唔係就要成日轉位。
Check in完之後喺機場入面個商場行，鬼死咁細，比起內陸線機場少好多嘢行。機場啲嘢比出面貴，好似一支ettusais新出嘅孔筆，市區賣千二佢賣千五。所以除左買左些少零食同喺市區搵唔到嘅自動縮骨遮之外，都無咩點買嘢。呢個蘋果年輪蛋糕好好食，上次喺羽田買過一次，要喺閘出面買，入左閘係無得賣嘅。
無嘢行又無嘢做唯有又坐低食嘢。
坐到差唔多就入閘，主要係買手信返香港。又買到一食二袋上機。期待下次再嚟過！
沒有留言:
發佈留言