今日好幾間百貨公司開始減價嘅日子！包括京王、小田急、0101等等。全部都喺新宿有，所以我哋今日行程集中喺新宿！
第一站去左京王先。
呢間百貨公司賣啲嘢好成熟，啱銀髮族。所以兜左個圈就走左。第二站去左小田急，都係啱上左年紀嘅人行，雖然佢有個後生版嘅HALC，有Tiger、Fred Perry等等，一係就想買果啲無特價，唔係就無我想買嘅嘢，好似尋日喺裏原宿買果對金色Tiger，呢到就無得賣。結果又係咩都買唔到。
過埋去0101，呢到終於都似返啲樣，賣啲嘢後生啲。我喺到買到幾條毛巾，買多左2對Jelly Beans，而我老公喺到買到幾件衫。
行完呢幾間百貨公司又到食飯時間。諗唔到食乜，是但走左去伊勢丹頂樓果到食鰻魚飯，感覺無名古屋食嘅咁好食！
食飽之後就喺新宿四圍行，行下地下街，偶然經過中村屋，買左個咖哩包！凍冰冰唔好食。
逛下逛下喺地下街見到間超級市場 - 三平ストア新宿店（03-33-521669），買左包巨峰同車厘子。之前幾日都有買巨峰嚟食，唔係好澀就好酸，今次買呢包就好好食，有返啲巨峰獨有甜味！車厘子亦都好甜！
返酒店順便兜埋佢高島屋！原本諗住睇下啲桃幾錢，睇下第二日會唔會過嚟買返香港，桃就唔平不過就見到啲蜜瓜特價，1000円有兩個。即刻買左，就算食唔晒都可以拎返香港。
返酒店擺低啲嘢同抖左一陣，6點零到就再出去博殺過。呢轉係去新宿站上面嘅Mylord。呢到主攻女裝。
點解咁晏先去因為佢夜晚7至8會再特價。
早啲去係睇下有咩啱，到7點先至買。但係去到個商場好多人，我驚想買果啲衫會賣晒，而佢本身巳經有特價唔太貴，所以唔忍手買咗先。
我喺到買衫嘅時候，老公等左一陣無咩做自己走左去小田急個超市到行，買左啲熟食做宵夜。
博殺到9點收鋪我哋先至搵地方食晚飯。之前一路都想搵串燒食，咁啱歌舞伎町入面見到一間食雞串燒嘅，就走左入去。是但點左幾樣嘢，有個拼盤、炸雞同燒魷魚，當然叫埋啤酒嚟送串燒啦，順便可以清清熱。埋單五千幾円，都唔平。
老公又無講買左宵夜，我哋見到間拉麵店走左入去再食過。
呢間麻麻地，佢個湯底咸得滯。一來驚食得太咸會收奶，二嚟食得太咸對身體都唔好，食左半碗就放棄！之後要返去執喼準備第二日返香港。
沒有留言:
發佈留言