2015七一假期東京之旅 - Day 2 28/6 (東京鐵塔One Piece Exhibitin、錦系町)

第二日我哋朝早去左東京鐵塔個One Piece展。之前上JAPANiCAN買定入場券，比現場買平少少。咁啱我買果陣有個優惠，可以再減300円。所以2700円就買到張入場券。入面都幾多嘢睇，亦都有好多One Piece精品賣，如果有睇開呢套動畫不況一看。

走都差唔多係食晏時間，跟住我哋去左有好多人介紹嘅「根室花丸」到食。

去左東京站呢間，去到勁多人排隊。

排左成個鐘先入到去食。我哋被安排坐Bar枱。

呢到啲壽司好新鮮，拍得住喺北海道食嘅咁新鮮！👍🏻！而且價錢唔貴，食左好幾碟海胆、穴子同帶子壽司夾夾埋埋差唔多廿碟。

另外仲叫左個好多人推薦嘅花咲蟹湯，ok啦係有成隻蟹嘅蟹殼喺碗湯入面！但係無啲人講到必飲咁誇張，有機會見到就試試無妨，但係就唔使刻意去搵嚟飲。

埋單都係5千幾円！一個字「抵」！

食完過去錦系町Akachan買阿女啲嘢。

有玩具啦、衫啦、泳衣啦。埋單又使左萬幾兩萬円。不過感覺上呢到無我哋喺札幌行果間咁多嘢賣，唔知係多遊客嚟呢間定係呢間鋪細啲。呢到個商場下面有間超級市場，賣啲生果都幾平幾靚，不過要早啲去先有，原本見到啲蜜瓜同啲桃都幾靚，想走果陣先走，點知去到果陣巳經賣晒，得返啲唔靚嘅。

行返過JR站果到見到個商場做緊特價，當然巡一巡，我老公就搵左間餐廳坐低，佢叫左個綠茶芭菲。

唔太甜幾好食！個商場賣啲嘢唔係我杯茶，所以無買到啲咩，跟住返酒店擺低啲嘢順便泵一泵奶。

之後又出返新宿附近行，去左松本清買藥妝品，出發先睇到好多台灣網友介紹用佢個app，詳情可以google一下，大把仔細教學，喺到唔多講。用左呢個app可以有85折，我哋貪得意都download左，比錢果陣問職員可唔可以用，職員話免稅或85折只可二擇其一。我哋以為所有嘢都可以85折，所以選左85折，點知睇返張單，原來好多專櫃化妝品都無折，例如Sofina，如果可以最好係分單啦。專櫃化妝品就退稅，普通藥妝品就用85折，咁樣會抵啲。

買完嘢過返歌舞伎町到搵地方食晚餐，行左個圈都諗唔到食乜，最終又係食拉麵。今次去左間叫「神座」嘅拉麵店到食。味道不過不失！

次次食完拉麵都好似唔滿足咁，經過雪糕機又買左支期間限定嘅桃味雪糕食。

經過便利店又買左兜菜食，講實嚟親日本，除左食自助餐，如果唔係食菜係比香港少好多！所以久唔久要補返啲「菜」。